SARANDË- Pronari i clubit 'Orange' në Sarandë, Spiro Iljadhi është vënë në pranga në Qafë Botë. Një muaj, pasi punonjësi i tij i mitur ndërroi jetë në vendin e punës, Policia e Shtetit ka lokalizuar Spiro Iljadhin, teksa po kalonte në pikën kufitare të Qafë Botës. Ai ishte shpallur në kërkim një muaj më parë, pasi në clubin e tij, kamareri 17-vjeçar Antonio Delilaj, humbi jetën pasi e zuri poshtë një ashensor që përdorej nga stafi i klubit të natës. Ashensori në këtë club ishte jashtë çdo parametri ligjor dhe për shkak të një defekti u shkëput, duke lënë të vrarë në vend të miturin që punonte.
Ngjarja e rëndë ndodhi në lagjen “Nr. 1", të Sarandës, në lokalin “Orange Club” ku është këputur kavoja e ashensorit që përdorej kryesisht për furnizimin e lokalit, duke zënë poshtë kamerierin 17 vjeç Antonio Delilaj, nga fshati Qafë Gjashtë. Inspektorati Shtetëror i Mbikëqyrjes së Tregut, deklaroi se pajisja e përshtatur për transport mallrash nga subjekti, e cila ka pësuar defekt, nuk është ashensor dhe për rrjedhojë nuk është inspektuar.
NJOFTIMI I POLICISË:
Qafë Botë, Sarandë/Kapet dhe vihet në pranga pronari i lokalit ku një muaj më parë, për shkak të këputjes së kavos së ashensorit, humbi jetën një 17-vjeçar i punësuar në këtë lokal. Shërbimet e Stacionit të Policisë Kufitare Qafë Botë, si rezultat i kontrolleve të shtuara për goditjen e krimeve kufitare dhe kapjen e shtetasve në kërkim, kanë kapur dhe ndaluar shtetasin në kërkim S. I., 37 vjeç, banues në Sarandë. Gjykata e Shkallës së Parë e Juridiksionit të Përgjithshëm Sarandë ka caktuar ndaj këtij shtetasi, masën e sigurisë “Arrest në burg”, për veprën penale “Shkelja e rregullave të mbrojtjes në punë”, pasi më datë 26.08.2023, në lokalin në pronësi të tij, për shkak të këputjes së kavos së ashensorit, humbi jetën një 17-vjeçar i punësuar në këtë lokal. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme./Zëri.ai
