LEZHË-Në fund të korrikut pritet të jetë i gatshëm kampi në Gjadër për emigrantët që do të vijnë nga Italia, dhe i gjithë operacioni të nisë punën, me praninë e një personeli prej 300 vetësh, nga të cilët 176 të Policisë. Teksa çdo gjë duket se po shkon në rrugën e duhur, mediat italiane kanë zbuluar detaje të reja nga marrëveshja Shqipëri-Itali.
Marrja me qira për 90 ditë e anijes që do të shërbejë për transportin e emigrantëve nga Italia drejt Shëngjinit mund të kushtojë deri në 13.5 milionë euro. Kjo parashikohet nga “konsultimi paraprak i tregut” i nisur nga Ministria e Brendshme për zbatimin e protokollit ndërmjet Romës dhe Tiranës, me “kontratë tre mujore, nga 15 shtatori deri më 15 dhjetor 2024”.
200 emigrantë dhe 100 operatorë në bord
Sipas specifikimeve teknike për shërbimin, ku “pika e grumbullimit të emigrantëve” identifikohet “rreth 15/20 milje detare në jug-jug/perëndim të ishullit të Lampedusas”. Flitet për një transport prej “rreth 300 njësi” (200 emigrantë dhe 100 operatorë), dhe “tre deri në katër udhëtime në muaj (ardhje vajtje-ardhje)”.
Çdo operacion do të zgjasë deri në 6 ditë
Kohët e lundrimit nga pika e marrjes deri në destinacion llogariten në "rreth 50 orë" në dokumentin e Ministrisë së Brendshme për "specifikimet teknike për një shërbim me qira të një njësie detare, me ekuipazhin e saj, për transportin e emigrantëve në det". Kohëzgjatja e çdo operacioni tregohet si "5/6 ditë", duke përfshirë "transportimin e migrantëve, aktivitetin e qendrës, transportin për në Shqipëri, aktivitetet e zbarkimit dhe kthimin në zonën e operacionit".
Kërkesat e anijes
Ndër kërkesat për anijen, janë: kapaciteti për të transportuar afërsisht 300 pasagjerë, 200 migrantë plus 100 operatorë; një minimum prej 50 kabinash, secila me një maksimum prej dy shtretër; “i përshtatshëm për ankorim në portin e Shëngjinit”; një dhomë për ekzaminimin e migrantëve; një për t’u përdorur si dhomë sigurie për nevojat e policisë gjyqësore; një dhomë për infermierinë; dhe zona për karantinë të mundshme.
“Shërbimi i menaxhimit të pronarëve të anijeve do të jetë përgjegjësi e operatorit me të gjitha detyrimet dhe përgjegjësitë”, saktësohet në dokument.
Për më tepër, ekzekutimi i shërbimit përfshin furnizimin e mallrave dhe produkteve ushqimore, si dhe përgatitjen e ushqimeve në lidhje me porositë fetare apo ndonjë problem shëndetësor. Nëse tejkalohet mesatarja prej 300 njësive për ditët e kohëzgjatjes së kontratës, do të njihet një “kosto shtesë për frymë prej 40 euro/ditë për numrin e pasagjerëve”.
“Duke pasur parasysh paparashikueshmërinë e evolucionit të flukseve migratore dhe rrjedhimisht pamundësinë e përcaktimit sasior të numrit të saktë të kalimeve të nevojshme”, lexojmë në kapitullin e fundit të dokumentit, nëse distanca e lundrimit për kohëzgjatjen e kontratës do të jetë më e vogël se 6 mijë milje aktiviteteve detare, kostoja e qirasë do të ulet me 15%.
Më datë 6 nëntor 2023, kryeministri shqiptar Edi Rama dhe kryeministrja italiane Georgia Meloni nënshkruan në Romë marrëveshjen, për të ndërtuar në Shqipëri dy qendra për të strehuar emigrantët. Sipas marrëveshjes, porti i zbarkimit të emigrantëve do të jetë Shëngjini, ndërsa Gjadri do të jetë kampi ku do të ndërtohet vendqëndrimi i tyre. Strukturat e krijuara në Shqipëri, do të mund të strehojnë gjithsej deri në 3 mijë emigrantë në muaj, për një parashikim prej 36 mijë personash në vit. Qëllimi është që për ta të përfundojnë me shpejtësi procedurat për shqyrtimin e kërkesave për azil apo riatdhesimin e tyre të mundshëm. Një total prej 653 milionë eurosh do të shpenzohen për 5 vite, përfshirë këtu akomodimin dhe sigurinë e refugjatëve. Brenda kësaj kostoje përfshihen gjithashtu përgatitja e 20 sallave gjyqësore për seancat në Shqipëri, si dhe rikthimin e refugjatëve sërish në Itali. /ZËRI
