SPANJË-Garda Civile e Spanjës, në kuadër të operacionit “Kupina”, ka çmontuar tre plantacione të kultivimit të kanabisit në rajonin e Luginës së Guadalhorce. Pesë persona me kombësi shqiptare dhe spanjolle janë identifikuar të përfshirë në organizatën kriminale të drogës. Mediat vendase raportojnë se gjatë kontrolleve janë arrestuar tre anëtarë të këtij rrjeti, ndonëse sipas Gardës Civile po vijojnë gjetjen e pjesës tjetër të të përfshirëve dhe nuk përjashtohen arrestime të tjera.
Hetimi filloi marsin e kaluar kur agjentët mësuan për ekzistencën e një plantacioni të mundshëm të paligjshëm marijuane në një magazinë industriale në qytetin e Cártama. Për këtë arsye është kryer përgjimi, i cili ka çuar në arrestimin e një personi me kombësi spanjolle, i cili udhëtonte me furgon pranë vendit. Autori kishte gjithsej 380 bimë kanabis të fshehura brenda automjetit.
Agjentët mundën të verifikonin se ky rrjet kishte edhe plantacione të tjera në një magazinë në qytetin Coín dhe në një shtëpi të izoluar në bashkinë Álora, të cilat ishin lidhur ilegalisht me rrjetin elektrik për t’i furnizuar ato. Më pas janë kryer tre kontrolle që kanë të bëjnë me sekuestrimin e 400 bimëve të kësaj lënde, 28 kg drogë dhe një armë zjarri 9 mm. Vijon puna për kapjen e dy personave të tjerë./ZËRI
