BRITANI E MADHE- Shtetasit e huaj kanë më shumë se tre herë më shumë gjasa të arrestohen për krime seksuale sesa qytetarët britanikë. Sipas "The Telegraph", Policia kreu më shumë se 9000 arrestime të shtetasve të huaj në 10 muajt e parë të vitit të kaluar. Të dhënat e siguruara nga institucionet britanike bëjnë me dije se të huajit në Mbretërinë e Bashkuar kishin 3.5 herë më shumë gjasa për t'u arrestuar për vepra të karakterit seksual, duke shënuar afro 165 arrestime për 100,000 të popullsisë.
Tabela vendos shqiptarët si kombësinë më të mundshme për t'u arrestuar, të ndjekur nga afganët, irakianët, algjerianët dhe somalezët. Ishin deputetët konservatorë, ata që kërkuan publikimin e të dhënave, duke marrë shembull Danimarkën por edhe disa shtete të SHBA-së.
Shtetasit e huaj përbëjnë 5.5 milionë të popullsisë në Britani, ndërsa në total, popullësia shënon 53.5 milionë banorë.
Por për të gjitha krimet, rumunët përbënin numrin më të madh të arrestimeve me 11,678 persona në pranga, të ndjekur nga polakët (9583), shqiptarët (5,665), indianët (5,414), pakistanezët (4,171), nigerianët (3,317), lituanezët (3,253) dhe iranianët (3,000). Megjithatë, pasi të ponderohen për popullsinë përkatëse, bazuar në shifrat e fundit të ONS nga viti 2021, shqiptarët kishin shkallën më të lartë të arrestimeve me 209.8 arrestime për 1000 persona, të ndjekur nga afganët (106.9), irakianët (92.9), algjerianët (72.7), marokenët. (70) dhe somalezët (64.6). Shkalla e arrestimeve për britanikët ishte 12 persona për 1000 banorë.
Robert Bates, themeluesi dhe drejtori i kërkimit i Qendrës për Kontrollin e Migracionit, tha për "Telegraph": Nuk duhet të ketë asnjë shtetas të huaj në MB që po shkel ligjet tona. Asnjë! Megjithatë, ne kemi në njëfarë mënyre mbi 10,000 shtetas të huaj në burgjet e Britanisë, shumë të tjerë në provë ose të liruar, dhe një tufë shkelësish përsëritës që ende nuk jemi në gjendje që t'i dëbojmë nga vendi ynë.
Në këto kushte, sipas Bates, Home Office duhet të jetë shumë më i rreptë ndaj kombësive që kanë më shumë gjasa të përfshihen në kriminalitet./ZËRI
