TIRANË- Tre të arrestuarit për vrasjen e Aurelio Dervishit janë lënë në burg nga Gjykata e Tiranës. Të tre adoleshentët akuzohen për vrasje me paramendim, ndaj edhe togat e zeza i kanë lënë në masën e sigurisë "arrest me burg". Për vrasjen e tij, Policia vuri në pranga 4 persona, mes tyre 3 të mitur të moshave 15 dhe 16 vjeç dhe Frensis Shahu, 20 vjeç.
Si ndodhi ngjarja?
Aurelio Dervishi humbi jetën gjatë një sherri me thika mes disa të rinj. Shkak për sherrin mes të rinjve që degjeneroi më pas në vrasje, dyshohet të jetë bërë një vajzë që ishte e dashura e shokut të Dervishit, por që më herët kishte qenë e lidhur me një tjetër djalë që ishte pjesë e grupit të agresorëve. Të katër autorët po udhëtonin me makinë dhe i kanë dhënë sinjal me drita Dervishit që të ndalonte dhe të përballej me ta.
Të rinjtë janë përleshur fizikisht, ndërsa një 15-vjeçar që ishte mes tyre e ka qëlluar me thikë në gjoks Dervishin duke e lënë të vdekur. Policia ka shoqëruar dhe shokun e viktimës, i cili ishte shofer në makinën me të cilën ata udhëtonin në momentin e vrasjes. Në Polici ndodhen edhe katër agresorët, Frensi Shehu 20 vjeç dhe tre të mitur, dy 16-vjeçarë dhe 15-vjeçari që dyshohet të jetë autori./ZËRI
