MALI I ZI- Policia e Malit të Zi mëngjesin e sotëm ka zbuluar 18 pako me kokainë në pikën kufitare Debeli Brijeg, e cila dyshohet se vinte nga Shqipëria. Droga u gjet në një automjet me targa franceze, i cili drejtohej nga një shtetas shqiptar, Arvid Halili. Sipas raportimeve droga ishte fshehur nën sediljen e shoferit dhe të pasagjerit, informon Vijesti.
“Një sasi e madhe droge është gjetur në një hapësirë të posaçme nën sediljen e shoferit dhe të pasagjerit, gjatë kontrollit të detajuar të veturës së pasagjerëve “BMW”, i cili është kryer nga doganierët dhe policia kufitare”, njofton dogana malazeze.
Nga raportimet e fundit të Policisë së Shtetit me autoritetet e Malit të Zi ka rezultuar se Arvid Halili, i cili është kapur në vendin fqinj, destinacion kishte Shqipërinë, pra lëndën narkotike po e sillte në vendlindje. Mësohet se 34-vjeçari ka hyrë në Mal të Zi nga pika kufitare me Kroacinë. Halili është arrestuar ndërsa malli i është dorëzuar efektivëve të Departamentit të Antidrogës në Drejtorinë e Policisë.
Ndërkohë, policia jonë ka nisur verifikimet brenda vendit për të gjurmuar persona të tjerë pjesë e rrjetit kriminal që do të prisnin në vendin tonë kokainë Paketimet janë të së njëjtës madhësi, peshë dhe formë, të ngjitura me shirit.Nuk dihet ende se sa është sasia e saktë e drogës së gjetur, dhe pritet të peshohet në vijim.
