TIRANË- Një 57-vjeçar ka humbur jetën si pasojë e një zjarri që ka rënë në banesën e tij, në një pallat në rrugën Ferit Xhejko në Tiranë.
Viktima është identifikuar si Ramazan Duka, i cili jetonte me qera në apartamentin që u përfshi nga flakët. Duke folur për mediat, fqinjët shprehen se nuk e njihnin shumë mirë të ndjerin, pasi vetëm pak javë më parë ishte vendosur në këtë banesë.
57 vjeçari që ndërroi jetë është gjetur në dhomën e gjumit, i cili sipas policisë nuk është prekur nga zjarri. Dyshohet se 57 vjeçari ka ndërruar jetë si pasojë e asfiksimit nga tymi që është përhapur në banesë.
Policia njofton se zjarri ka rënë rreth orës 03:00 të mëngjesit të sotëm, ndërsa nuk bëhen ende me dije shkaqet e ngjarjes tragjike.
'Më datë 25.11.2023, rreth orës 02:50, në rrugën “Ferit Xhajko”, ka rënë zjarr në një banesë në katin e 5–të, të një pallati, dhe si pasojë ka ndërruar jetë shtetasi R. D., 57 vjeç. Grupi hetimor po punon për sqarimin e rrethanave të ngjarjes.'- njofton policia.
Zona ku ka rënë zjarri është rruga që lidh zonën e Medresesë me zonën e spitaleve në Tiranë.
/Zëri.ai
