SPANJË- Një gjykatë spanjolle hapi një gjyq të mërkurën mbi një padi prej 550 milionë eurosh të ngritur nga më shumë se 80 organizata mediatike spanjolle kundër pronarit të Facebook-ut, Meta, për shkelje të dyshuar të rregullave të mbrojtjes së të dhënave të Bashkimit Evropian.
Rregullat e BE-së i detyrojnë kompanitë të marrin pëlqimin e përdoruesve për të krijuar reklama të personalizuara nga të dhënat e tyre.
Shoqata kryesore e medias në Spanjë, AMI, thotë se gjigandi amerikan i teknologjisë, i cili zotëron gjithashtu Instagram dhe WhatsApp, krijoi "konkurrencë të padrejtë" duke shkelur "sistemikisht" ligjin midis majit 2018 dhe korrikut 2023.
Shoqata pretendon konkurrencë të padrejtë në shitjet e reklamave dixhitale dhe po kërkon 551 milionë euro (647 milionë dollarë) kompensim.
"Ky nuk është një rast që prek vetëm mediat e AMI-t, por ka implikime për median në mbarë botën", u tha gazetarëve drejtoresha e përgjithshme e AMI-t, Irene Lanzaco, përpara se të hynte në gjykatën tregtare të Madridit, ku gjyqi do të zgjasë deri të enjten.
"Ajo që është në rrezik është vetë mbijetesa e mediave të lajmeve, e cila po kërcënohet nga sjellja grabitqare e një platforme si Meta, e cila vepron pa marrë parasysh kuadrin tonë ligjor."
Meta ka mohuar çdo dëm ose shkelje të rregullave të BE-së, duke thënë në një deklaratë dërguar AFP-së se padia e AMI-së "nuk bazohet në asnjë provë në lidhje me dëmin e supozuar".
Grupet mediatike të përfaqësuara nga AMI përfshijnë Prisën, pronare e gazetës së përditshme më të shitur në Spanjë, El Pais; Godo, botuese e së përditshmes me qendër në Barcelonë, La Vanguardia; Vocento, e cila boton të përditshmen konservatore ABC; dhe Unidad Editorial, titujt e së cilës përfshijnë El Mundo dhe të përditshmen sportive Marca.
Stacionet radiotelevizive spanjolle kanë nisur një padi të veçantë kundër Metës për të njëjtat arsye, duke kërkuar 160 milionë euro dëmshpërblim.
Një padi e ngjashme është ngritur edhe në Francë, ku rreth 200 grupe mediatike, përfshirë rrjete të mëdha televizive dhe gazeta kryesore, ngritën padi kundër Metës në prill./ZËRI
