MAQEDONIA E VERIUT- Një person është arrestuar dhe disa të tjerë janë shoqëruar pas incidenteve raciste antishqiptare që shpërthyen gjatë një ndeshjeje basketbolli mes Maqedonisë së Veriut dhe Rumanisë gjatë fundjavës. Ministria e Punëve të Brendshme të Maqedonisë së Veriut njoftoi sot arrestimin e 30-vjeçarit nga Kumanova, me iniciale S. M.. Ky i fundit akuzohet se tentoi të sillte një banderolë fyese gjatë pushimit të ndeshjes, ndërsa pasi të sqarohet rasti, kundër tij do të ngrihet një padi përkatëse. Ministria apeloi për tifozeri të ndershme dhe sportive, teksa paralajmëroi masa të ashpra ndaj thirrjeve raciste dhe etnike që provokojnë situata nacionalizmi të padëshirueshme.
“Ministria e Brendshme e Maqedonisë së Veriut apelon për tifozeri të ndershme dhe sportive, dhe çdo fyerje do të sanksionohet ashpër. Ministria e Brendshme apelon të gjithë qytetarët dhe anëtarët e grupeve të tifozëve që të bëjnë tifozeri për sportistët e tyre të preferuar, por në mënyrë sportive, ekskluzivisht në frymë sportive, pa gjuhë urrejtjeje, pa asnjë fyerje të bazuar në përkatësi personale, etnike, fetare ose ndonjë përkatësie tjetër që nuk është e përshtatshme për gara sportive dhe është në kundërshtim me ligjin.
Në lidhje me ndeshjen e basketbollit që u zhvillua më 02.08.2025 në Pallatin e Sporteve në Kumanovë, disa të dyshuar tashmë janë thirrur në Departamentin e Policisë së Kumanovës dhe është kryer një intervistë zyrtare, dhe pas analizave të kryera në koordinim me Prokurorinë Publike të Kumanovës, do të merren masa specifike ligjore kundër personave të përfshirë dhe ndjekje penale. Sot, oficerët e Departamentit të Policisë së Kumanovës e privuan nga liria S.M. (30) nga Kumanova, i cili dyshohet se është përpjekur të sjellë një banderolë me përmbajtje fyese gjatë pushimit të një ndeshjeje basketbolli. Pasi të sqarohet plotësisht rasti, kundër tij do të ngrihet një padi përkatëse.
Në këtë kontekst, Ministria e Brendshme thekson edhe një herë se në kuadër të sigurimit të garave sportive paqësore dhe të pandërprera, policia do të jetë jashtëzakonisht rigoroze në lidhje me çdo shkelje të rendit dhe qetësisë publike, përkatësisht çdo thirrje ofenduese të bazuar në përkatësi kombëtare, etnike ose fetare, dhe kjo do të sanksionohet në mënyrën më të ashpër, pa asnjë tolerancë. Vetëm brohoritjet e ndershme sportive mund të na sjellin sukses, fitore dhe gëzim sportiv”, thuhet në njoftimin e Ministrisë së Brendshme.", njoftoi Ministria e Brendshme.
Incidenti ka shkaktuar reagime të shumta në Maqedoninë e Veriut, Kosovë dhe Shqipëri. Kryeministri Hristijan Mickoski, i cili dy ditë pas ndeshjes dënoi “thirrjet nacionaliste dhe ksenofobike”. Gjithashtu, presidentja e Kosovës, Vjosa Osmani, deklaroi se thirrjet antishqiptare të dëgjuara në Kumanovë janë të papranueshme dhe “cenojnë frymën e bashkëjetesës dhe respektit të ndërsjellë”, teksa kërkoi nga autoritetet maqedonase që të veprojnë dhe të ndëshkojnë ata që nxisin urrejtje./ZËRI
