KOPENHAGEN- Danimarka ishte përgatitur të hidhte në erë aeroportet për të ndaluar një pushtim të mundshëm amerikan të Groenlandës, raportuan televizioni publik i vendit dhe BBC. Sipas mediave vendase, ushtarët danezë që u dërguan me aeroplan në Groenlandë në janar ishin të përgatitur të hidhnin në erë pistat kryesore të aeroportit, mes frikës se Presidenti i SHBA-së Donald Trump mund të pushtonte ishullin Arktik.
Duke cituar burime në qeverinë dhe ushtrinë daneze, si dhe aleatët evropianë, në artikull thuhej se furnizimet me gjak po transportoheshin gjithashtu për të trajtuar të plagosurit në rast përleshjesh.
Financial Times raportoi se dy zyrtarë evropianë më vonë e konfirmuan raportin. Ministria daneze e Mbrojtjes i tha BBC-së se "nuk do të komentojë". Një zyrtar i lartë ushtarak danez, duke folur në kushte anonimiteti, i tha BBC-së se pak njerëz ishin informuar për operacionin, për arsye sigurie.
Si Shtetet e Bashkuara ashtu edhe Danimarka janë anëtare të NATO-s, dhe çështja e Groenlandës - një pjesë gjysmë-autonome e Danimarkës - ka përçarë thellësisht Uashingtonin dhe aleatët e saj evropianë. Trump ka thënë vazhdimisht se do të donte të aneksonte Groenlandën gjatë mandatit të tij të dytë. Udhëheqësit e Groenlandës dhe Danimarkës kanë hedhur poshtë vazhdimisht kërkesat e tij për të blerë ishullin./ZËRI
