SERBI- Serbia është duke blerë gjithnjë e më shumë municion, duke përforcuar repartin e saj të mbrojtjes. Prej vitit 2021, shteti që drejtohet nga Aleksandër Vuçiç ka kërkuar me ngulm që të blejë nga Franca 12 avionë luftarakë shumëfunksional të emërtuar “Rafale” ose siç njihen ndryshe “Shpërthimi i zjarrit”. Sipas asaj që shkruajnë mediat serbe, marrëveshja është finalizuar gjatë vizitës së fundit që Vuçiç ka pasur në Francë. Ku është takuar me prodhuesin francez të avionëve për të diskutuar rreth blerjes së tyre.
Vlera e përllogaritur e 12 avionëve luftarakë shkon deri në 3 miliardë euro. Bëhet fjalë për avionin më modern të gjeneratës së katërt e gjysmë, një prej platformat më moderne që mund të ofrojë Evropa Perëndimore.
“Do të kemi edhe nënshkrimin e një kontrate që do të përmirësojë ndjeshëm sigurinë e vendit tonë”, tha Vuçiç i cili shtoi se kontrata mund të nënshkruhet në dy muajt e ardhshëm. Marrëveshja për këto avionë luftarakë vjen në momentin kur Vuçiç ka urdhëruar ushtrinë të nisë stërvitjen më të madhe të parë ndonjëherë në Serbi.
Karakteristikat e avionëve “Rafale”, ose “Shpërthimit të zjarrit”
I pajisur me një gamë të gjerë armësh, rreth 20 të tilla, përfshirë raketa, Rafale synon të kryejë misione të epërsisë ajrore, ndalimit, zbulimit ajror, mbështetjes tokësore, goditjes së thellë, goditjes kundër anijeve dhe misione të parandalimit bërthamor.
Mjeti ajror ushtarak francez, që kap një shpejtësi mbi 1900 kilometra në orë, ka një hapje krahësh prej 11 metrash dhe gjatësi 15 metra, është përfshirë në luftime mbi Afganistan, Libin, Mali, Irak dhe Siri.
/ZËRI
