GAZA- Një grup që lobon për familjet e pengjeve izraelite që mbahen nga Hamasi thotë se janë të pushtuar nga ankthi pasi mendojnë se operacioni i zgjeruar tokësor i Izraelit po i vë ata në rrezik.
"Kjo natë ishte më e tmerrshmja nga të gjitha netët. Ishte një natë e gjatë dhe pa gjumë, në sfondin e operacionit të madh dhe pasigurisë absolute në lidhje me fatin e pengjeve të mbajtura atje, të cilët janë mes bombardimeve,”- tha Forumi i Pengjeve dhe Familjeve të Zhdukura në një deklaratë.
"Ankthi, zhgënjimi dhe zemërimi veçanërisht i madh që asnjë nga kabineti i luftës nuk mori iniciativën të takohej me familjet e pengjeve për të shpjeguar nëse operacioni tokësor rrezikon mirëqenien e 229 pengjeve në Gaza,”- vazhduan ata.
Rachel Goldberg dhe Jon Polin, prindër të Hersh Goldberg-Polin, një amerikan 23-vjeçar i cili u plagos dhe u rrëmbye nga Hamasi në një festival muzikor izraelit, thanë në një deklaratë të veçantë se zgjerimi i operacionit tokësor të Izraelit në Gaza ishte shqetësim ekstrem për ta.
“Ne lutemi për sigurinë e ushtarëve izraelitë në vijën e frontit ndërsa ata fillojnë misionin e tyre dhe sigurinë e të gjithë pengjeve dhe të të pafajshmëve. Ne i kërkojmë të gjithë liderëve botërorë, veçanërisht të 33 vendeve të përfaqësuara mes pengjeve, të ndërmarrin veprime urgjente dhe të menjëhershme për të sjellë të gjithë pengjet në shtëpi të sigurt. Nuk ka asnjë moment për të humbur,”- thanë ata.
Zëdhënësi i Forcave të Mbrojtjes së Izraelit (IDF) adm. Daniel Hagari u tha gazetarëve të premten se ata kishin njoftuar familjet e pengjeve për operacionet e zgjeruara. Zgjerimi i ushtrisë izraelite të operacionit të saj tokësor në Gaza ka vënë në pikëpyetje fatin e më shumë se 200 pengjeve që mbetën brenda zonës së rrethuar.
Hamasi ka liruar gjithsej katër pengje që nga sulmet e tij të 7 tetorit, por 224 mbeten ende të bllokuar brenda Gazës. Mes pengjeve ka civilë dhe ushtarë izraelitë, si dhe shtetas të huaj e fëmijë deri në 9 muajsh. Midis tyre ka shumë pengje që mbajnë pasaporta të huaja nga 25 vende të ndryshme, duke përfshirë Meksikën, Brazilin, Shtetet e Bashkuara, Gjermaninë dhe Tajlandën.
