KARAKAS- Manjati venezuelian i naftës Wilmer Ruperti u arrestua nga autoritetet në vendin e tij të enjten, thanë avokatët e tij. Sipas firmës ligjore Winston & Strawn, Rupertit iu kërkua të merrte pjesë në një takim me policinë rreth orës 13:00 të enjten, ku u arrestua së bashku me truprojat e tij, të cilët u liruan më vonë, por vetë Ruperti mbeti në paraburgim.
Autoritetet nuk kanë dhënë ende asnjë shpjegim për arrestimin e tij.
"Jemi të shqetësuar për shëndetin e tij", tha firma.
Aktualisht, arsyeja pse autoritetet venezueliane arrestuan Rupertin është ende e paqartë, ndërsa Ministria e Informacionit e vendit nuk ka dhënë asnjë koment.
Kush është Wilmer Ruperti?
Wilmer Ruperti është një pronar anijesh dhe manjat nafte me lidhje të ngushta me qeveritë socialiste të Venezuelës. Ai u bë i njohur pasi ndihmoi në transportimin e naftës në vendin e tij gjatë grevës së viteve 2002-2003 në kompaninë shtetërore të naftës PDVSA, duke forcuar kështu lidhjet e tij të ngushta me presidentin e atëhershëm Hugo Chavez.
Në vitet e fundit, kompania e tij me seli në Gjenevë, Maroil Trading, është bërë një eksportuese e madhe e koksit të naftës (një nënprodukt i ngurtë, i pasur me karbon, i rafinimit të naftës bruto) nga Venezuela sipas një kontrate që nënshkroi me PDVSA-në, megjithëse ky partneritet më vonë dështoi për shkak të mosmarrëveshjeve mbi pagesat dhe kushtet e kontratës. Në vitin 2023, Reuters raportoi se PDVSA kishte pezulluar furnizimet për Maroil./ZËRI
