Presidenti i SHBA Joe Biden nënshkroi sot legjislacionin që do t'i jepte 61 miliardë dollarë ndihmë Ukrainës për luftën e saj me Rusinë, miratimi i të cilit nga Kongresi shënoi një fitore të rrallë ndërpartiake për të dhe i dha fund konfrontimit disamujor të tij me Republikanët.
Ky ligj "siguron mbështetje jetike për partnerët e Amerikës për t'u mbrojtur kundër kërcënimeve ndaj sovranitetit të tyre kombëtar", tha Biden, duke njoftuar se pajisjet ushtarake do të dërgoheshin në Ukrainë "brenda orëve të ardhshme".
Ligji siguron 61 miliardë dollarë ndihmë për Ukrainën, 26 miliardë dollarë të tjera për Izraelin, 1 miliard dollarë ndihmë humanitare për Gazën dhe 8 miliardë dollarë për të kompensuar fuqinë ushtarake të Kinës.
Tekstet e miratuara nga Kongresi "do ta bëjnë Amerikën dhe botën më të sigurt", tha Biden.
"Ky është një investim në sigurinë tonë," shtoi ai.
“Ne nuk do të përkulemi para askujt. Askujt. Dhe sigurisht jo Vladimir Putin. Ne nuk i braktisim aleatët tanë, ne i mbështesim ata. Ne nuk i lëmë tiranët të fitojnë, ne i rezistojmë. Ne nuk i shikojmë zhvillimet në botë si spektatorë, ne i formësojmë ato. Ja çfarë do të thotë të jesh superfuqi globale”, ka theksuar ai.
Duke iu referuar ushtrisë së Ukrainës, presidenti amerikan tha se ishte "një forcë luftarake me vullnetin dhe aftësinë për të fituar" luftën, ndërsa akuzoi republikanët pranë Donald Trump për bllokimin e ndihmës. Ai falënderoi kryetarin republikan të Dhomës së Përfaqësuesve për ndihmën në avancimin e projekt-ligjit, por vuri në dukje se ai duhet të përfshijë gjithashtu financimin për sigurinë kufitare.
Për Izraelin, Biden tha se siguria e tij është "me rëndësi kritike". Por në të njëjtën kohë, ai u bëri thirrje autoriteteve izraelite që të sigurojnë që ndihma humanitare të arrijë tek palestinezët në Gaza pa vonesë.
"Ne do të garantojmë menjëherë dhe do t'i ofrojmë këto ndihma, si ushqime, furnizime mjekësore dhe ujë të pijshëm," tha ai, duke iu referuar një popullsie që "po vuan rëndë" përballë katastrofës humanitare në vazhdim.
Presidenti amerikan nënshkroi gjithashtu një projekt-ligj, i cili ndalon aplikacionin TikTok nëse kompania pronare, ByteDance e Kinës, nuk i shet asetet e saj në SHBA brenda 9 deri në 12 muajve të ardhshëm. Kjo platformë është shumë e popullarizuar në mesin e të rinjve amerikanë me prirje të majtë, një grup popullsie që konsiderohet "kyç" për rizgjedhjen e Biden në zgjedhjet presidenciale të nëntorit.
Kryetari dhe CEO i TikTok Xu Zhicheu, menjëherë pasi Biden nënshkroi ligjin, tha se kompania "nuk po shkon askund" pasi beson se do të shfajësohet në gjykatë dhe do të bllokojë zbatimin e ligjit. Të jeni të sigurt, nuk po shkojmë askund”, ka thënë ai në videon që ka postuar.
“Faktet dhe Kushtetuta janë në anën tonë dhe presim që ato të mbizotërojnë sërish”, shtoi ai./ZËRI
