Mbyllet Posta serbe në Kosovë, ndërkombëtarët edhe njëherë kundër Kurtit: Po nxit tensione!

Albin Kurti

PRISHTINË- Pas një operacioni kontrolli në veri të vendit, Policia e Kosovës mbylli nëntë filiale të Postës së Serbisë. Sipas Autoritetit Rregullativ të Komunikimeve Elektronike dhe Postare të Kosovës (ARKEP) këto zyra nuk kishin licencë për të operuar në treg. Posta e Serbisë në Kosovë kryen pagesa të ndryshme për serbët në Kosovë, prej fondeve që ndan Qeveria serbe për ta, përfshirë pagat dhe pensionet. Puna e Postës është vështirësuar prej fillimit të këtij viti, për shkak të një vendimi të Bankës Qendrore të Kosovës (BQK), i cili e ka bërë euron si valutë të vetme për kryeje të pagesave me para të gatshme duke ndaluar dinarin serb.

Mbyllja e zyrave postare nxiti reagimin e ashpër të Beogradit zyrtar. Menjëherë autoritetet atje dolën në një deklaratë se qeveria e Kosovës po tentonte të nxiste konflik. 

Në mbrojtje të saj, në një njoftim për mediat Autoriteti Rregullativ i Komunikimeve Elektronike dhe Postare tha se në të kaluarën janë bërë përpjekje që çështja e operimit të postës të diskutohet në kuadër të dialogut Kosovë-Serbinë Bruksel, por si pasojë e kundërshtimit nga pala serbe, kjo çështje asnjëherë nuk është trajtuar edhe pse është përmendur në Marrëveshjen për Telekomunikacion. Ndaj edhe u desh të vepronin pasi asnjë prej bizneseve nuk ishte i regjistruar dhe nuk kishte një numër fiskal.

I menjëhershëm ishte reagimi i autoriteteve të Beogradit.

"Me veprimet e fundit në veri të Kosovës, qeveria e Albin Kurtit po synon të provokojë një konflikt të hapur. Banditët e tij në mënyrë të njëanshme dhe në kundërshtim me të gjitha marrëveshjet, pushtuan hapësirat e Postës në Leposaviç, Mitrovicë të Veriut, Zveçan dhe Zubin Potok."

Kurse Lista Srpska, partia më e madhe e serbëve të Kosovës, tha se heqja e shërbimeve postare, pas heqjes së dinarit është goditja më e rëndë për funksionimin e institucioneve serbe në këto zona.

"Edhe një herë i bëjmë thirrje komunitetit ndërkombëtar që të veprojë urgjentisht dhe ta ndalojë Kurtin të përpiqet të dëbojë serbët nga vatrat e tyre, sepse është detyrë e tyre të mbrojnë të gjithë qytetarët, përfshirë serbët dhe të mos lejojnë paqëndrueshmëri rajonale,”-kërkoi Lista Srpska.

Nuk vonoi shumë dhe ndërkombëtarët reaguan. Ambasada Amerikane në Kosovë doli me një deklaratë zyrtare ku shprehej “thellësisht e zhgënjyer” me veprimet e qeverisë në Veri të Kosovës. 

“Veprimet e pa bashkërenduara i vënë qytetarët e Kosovës dhe ushtarët e KFOR-it në rrezik më të madh, përshkallëzojnë në mënyrë të panevojshme tensionet rajonale dhe dëmtojnë emrin e Kosovës si një partner i besueshëm ndërkombëtar”, thuhet në një komunikatë të ambasadës amerikane në Prishtinë, në të cilën i bëhet thirrje qeverisë së Kosovës “që t’i jap fund çdo veprimi të mëtejshëm të njëanshëm dhe t'i kthehet angazhimit konstruktiv në bisedimet e lehtësuara nga Bashkimi Evropian për të zgjidhur çështjet që kanë të bëjnë me normalizimin e marrëdhënieve ndërmjet Kosovës dhe Serbisë”.

Edhe Bashkimi Evropian nuk ishte më pak i ashpër. BE i bëri thirrje qeverisë së Kosovës që të rishqyrtojë vendimin e saj dhe të gjejë një zgjidhje të negociuar për këtë çështje.

“Veprimet e njëanshme dhe të pa bashkërenduara nuk mund të ofrojnë zgjidhje për këtë apo ndonjë çështje tjetër që i përket procesit të normalizimit ndërmjet Kosovës dhe Serbisë. Mbyllja e shërbimeve ekzistuese për serbët e Kosovës, pa ndonjë marrëveshje të re, do të ndikojë negativisht në jetën e përditshme dhe kushtet e jetesës së këtij komuniteti,”- thuhet në reagimin e BE-së.

Edhe pse shërbimet postare nuk kanë qenë pjesë e këtyre bisedimeve, të dyja palët patën rënë dakord që për to të diskutohej në një fazë të mëvonshme. Kosova dhe Serbia dialogojnë për normalizim marrëdhëniesh, nën ndërmjetësimin e Bashkimit Europian që prej vitit 2011. Palët kanë nënshkruar një mori marrëveshjesh, por jo të gjitha janë zbatuar./ZËRI

Në përputhje me standarded JTI