IZRAEL-Kryeministri Benjamin Netanyahu tha se Izraeli ka arritur më shumë se gjysmën e objektivave të tij të luftës në Iran, me fokusin aktual në rezervat e uraniumit të pasuruar të Teheranit. Në një intervistë për rrjetin televiziv amerikan Newsmax, Netanyahu theksoi se operacionet ushtarake ndodhen në një fazë të avancuar, ndërsa sugjeroi se regjimi iranian mund të përballet me një kolaps të brendshëm.
Ai sqaroi se ndryshimi i regjimit në Iran nuk përbën një objektiv zyrtar të operacioneve ushtarake, edhe pse zhvillimet e brendshme në vend mund të çojnë në një skenar të tillë.
“Jemi përtej gjysmës së rrugës për sa i përket suksesit të misionit, por nuk dua të vendos një afat kohor”, tha Netanyahu.
Kryeministri thotë se Izraeli dhe SHBA-të kanë goditur sistemet raketore, fabrikat e armëve dhe personelin bërthamor të Iranit, ndërsa paralajmëron se rrezet në rritje të raketave të Teheranit mund të kërcënojnë së shpejti Evropën dhe më gjerë.
