GREQI- E veshur si nuse dhe me arkivolin e rrethuar nga qindra njerëz, është përcjellë këtë të mërkurë në banesën e fundit 11-vjeçarja që u vra nga daja i saj në Greqi. Njerëzit shiheshin të gjithë të pikëlluar, ndërsa prindërit dhe pse të shkatërruar nga dhimbja gjetën forcën për ti prirë para arkivolit që mbante brenda të voglën e tyre. Fillimisht u raportua se para se ta vriste, daja e kishte përdhunuar, por raportohet se ekspertiza mjeko-ligjore nuk ka gjetur shenja të abuzimit tek e mitura.
Daja i të miturës nuk ëhstë një emër i panjohur për policinë. 37-vjeçari u arrestua në vitin 2017 me akuzën e përdhunimit të një vajze 14-vjeçare, e cila në fakt është kushërira e parë e babait të 11-vjeçares Vasilika. Në vitin 2020, sipas informacioneve të deritanishme, ai ishte dënuar në shkallë të parë nga gjykata e Zakynthos, por kërkesa e tij për pezullimin e ekzekutimit të dënimit ishte pranuar, deri në shqyrtimin e çështjes në Gjykatën e Apelit. Kështu, ai u la i lirë me kushte shtrënguese, ndër të cilat ishte edhe paraqitja në komisariatin e zonës së tij.
Me një dënim me kusht, vrasësi 37-vjeçar nuk shkoi kurrë në burg. Ligji e lejonte atë të qëndronte i lirë në mënyra kufizuese, por nëse do të gjykohej sot ai do të shkonte në burg.
E mitura ka humbur jetën për shkak të dy goditjeve fatale që daja i ka dhënë me një kaçavidë që kishte në dorë në momentin që tentoi ta përdhunonte. Siç u tregoi autoriteteve, vrasësi i pamëshirshëm (ende i paidentifikuar me emër) vetëm sa i kishte propozuar mbesës që të kryente marrëdhënie me të, por e mitura nuk kishte pranuar dhe i ishte përgjigjur duke i thënë se do t'i tregonte gjithçka familjes së saj. Nëna ka treguar se vajza e saj i kishte larë makinën dajës, i cili më vonë do bëhej vrasësi i saj. Madje ajo zbuloi se vajza e saj kishte kancer në mëlçi që në një moshë shumë të re./ZËRI
