SHBA-Pronari i kompanisë Tesla, Elon Musk, ka pasur kontakte të vazhdueshme me presidentin rus, Vladimir Putin, që nga fundi i vitit 2022. Sipas burimeve të inteligjencës të gazetës amerikane, The Wall Street Journal, këto kontakte vazhduan edhe gjatë këtij viti, duke u shoqëruar me kritika nga Musk për mbështetje ushtarake të SHBA-së për Ukrainën. Miliarderi është angazhuar gjithashtu në fushatën zgjedhore të ish-presidentit republikan, Donald Trump.
Raportohet se Putin i kërkoi Muskut të shmangte aktivizimin e shërbimit satelitor të internetit Starlink mbi Tajvan, si një favor për presidentin kinez, Xi Jinping. Ndikimi i Musk shtrihet përtej politikës përmes platformës së tij sociale, X, dhe kompanisë SpaceX, e cila ka kontrata të rëndësishme qeveritare dhe leje sigurie të nivelit të lartë.
Pas pushtimit të Ukrainës nga Rusia në vitin 2022, Musk ofroi ukrainasve akses falas në internet, duke kontribuar në aftësinë e tyre për të luftuar. Megjithatë, marrëdhëniet midis tij dhe autoriteteve ukrainase u ftohën ndërsa ai ndaloi financimin e terminaleve për Ukrainën dhe kufizoi përdorimin e Starlink nga ushtria ukrainase për të kontrolluar dronët.
Në tetor të vitit 2022, Musk propozoi një plan të paqes që favorizonte Kremlinin, i cili shkaktoi reagime të forta nga zyrtarët ukrainas, përfshirë presidentin Volodymyr Zelensky. Sipas raportimeve të inteligjencës ushtarake ukrainase, në fillim të vitit 2024, shërbimi satelitor i Muskut po përdorej nga ushtria ruse në frontin ukrainas. Këto zhvillime tregojnë se marrëdhëniet midis Musk dhe Putinit vazhdojnë të jenë të ndërlikuara, me ndikime të ndërsjella në politikën globale./ ZËRI
