SHBA- Sekretari i Përgjithshëm i NATO-s, Mark Rutte, ndodhet në Uashington, ku po takohet me Presidentin e SHBA-së, Donald Trump, në Shtëpinë e Bardhë. Të pranishëm janë edhe Zëvendëspresidenti i SHBA-së, J.D. Vance, dhe Sekretari i Shtetit, Marco Rubio. Gjatë takimit të tyre, Trump theksoi se është "shumë i pakënaqur" me Rusinë për shkak të luftës në Ukrainë. Madje bëri edhe një paralajmërim.
"Ne do të vendosim tarifa shumë të rënda nëse nuk arrijmë një marrëveshje brenda 50 ditësh,"-tha ai, duke lajmëruar se do të vendoste "100%" tarifa. Trump theksoi se dëshiron që lufta në Ukrainë të përfundojë dhe shtoi se është "i zhgënjyer" me homologun e tij, presidentin rus, Vladimir Putin. I pyetur në lidhje me tarifat e mundshme ndaj Rusisë, Trump tha se mund të vendosen pa miratimin e Dhomës së Përfaqësuesve ose Senatit.
"Mendova se do të arrinim ndonjë marrëveshje me Rusinë për luftën në Ukrainë nja 4 herë deri më tani. Dhe ja ku jemi ende duke folur. Mendova se do të kishim arritur një marrëveshje shumë kohë më parë, por situata vazhdon të zvarritet,"- tha ai.
"Rusia duhet të përqendrohet te tregtia, jo te lufta"
Trump shtoi se Moska duhet ta rikthejë ekonominë e Rusisë në rrugën e duhur. Ai tha se Rusia ka "potencial të jashtëzakonshëm" dhe shtoi se duhet t'i përdorë burimet e saj për tregti, jo për luftë.
"Unë flas shumë me të", tha Trump për Putinin, duke theksuar se bisedimet janë shumë të këndshme, por "ato nuk kanë asgjë kuptim" kur raketat ruse vazhdojnë edhe godasin qytete.
Nga ana e tij, Sekretari i Përgjithshëm i NATO-s, Mark Rutte, e përshëndeti vendimin, duke e përshkruar atë si "shumë të rëndësishëm". Siç tha ai, kjo iniciativë i lejon Ukrainës të vazhdojë të mbrohet kundër Rusisë, ndërsa përsëriti se financimi do të vijë nga aleatët evropianë. Rutte e përshkroi zhvillimin si një lajm të shkëlqyer për Kievin, duke falënderuar Presidentin Trump për iniciativën.
Përveç kësaj, Trump përsëriti se nëse do të kishte qenë në Shtëpinë e Bardhë në vitin 2022, pushtimi rus i Ukrainës nuk do të kishte ndodhur kurrë. Gjatë fjalimit të tij, ai përmendi një sërë krizash ndërkombëtare që, siç pretendoi, kishte arritur t'i zgjidhte në të kaluarën, duke theksuar se kishte pasur komunikim të shpeshtë me Presidentin rus Vladimir Putin pasi e kishte parashikuar luftën. Në të njëjtën kohë, ai vlerësoi guximin e ushtarëve ukrainas, duke theksuar se ata vazhdojnë të luftojnë me një trimëri edhe pse po humbasin pajisje ushtarake kritike në fushën e betejës./ZËRI
