TIRANË- Pak minuta na ndajnë nga nisja e protestës kombëtare të opozitës ndërsa dhjetëra demokratë janë mbledhur pranë selisë blu të mobilizuar me pankarta në duar, aty ku drejtuesit dhe deputetë e Partisë Demokratike janë mbledhur për të diskutuar dhe rakorduar detajet e fundit të kësaj proteste.
'Lironi liderin e opozitës', shkruhet në njërin prej tyre.
Sakaq, është vënë re një prani e shtuar e efektivëve pranë Kryeministrisë dhe përgjatë gjithë bulevardit “Dëshmorët e Kombit”.
Këtë të martë, 20 Shkurt, që përkon dhe me 33-vjetorin e rënies së bustit të diktatorit Enver Hoxha, demokratët do të zbresin në protestë përpara kryeministrisë. Protesta e sotme do të zhvillohet pa praninë fizike të liderit historik të tyre, Sali Berisha, i cili ndodhet nën arrest. Dhe pa praninë e një pjese të PD-së që përfaqësohet nga Lulzim Basha. Megjithatë pritshmëritë e organizatorëve flasin për një pjesëmarrje masive. Sali Berisha pritet që t’i drejtohet turmës së mbështetësve me një fjalim nga ballkoni i banesës së tij, i cili do të shfaqet para protestuesve përmes ekraneve./ Zëri.ai
