TIRANË- Avokati i njohur Saimir Vishaj është ndarë nga jeta në moshën 60-vjeçare, këtë të martë. Vishaj ishte i shtruar në Spitalin e Traumës, pasi kishte pësuar një rrëzim në banesën e tij, ku kishte marrë dëmtime të rënda trupore.
Gjendja e tij shëndetësore ishte përkeqësuar ndjeshëm gjatë ditës së djeshme, duke bërë që mjekët ta intubonin. Por, fatkeqësisht, avokati nuk ka mundur të mbijetojë pavarësisht përpjekjeve të bluzave të bardha.
Avokati u transportua të dielën me urgjencë në spital, pas dyshimeve se kishte rënë nga shkallët. Ndërkohë, në gusht 2025, Vishaj kishte treguar publikisht se kishte kaluar një sëmundje të rëndë, gjatë së cilës kishte qëndruar për një periudhë në koma dhe i intubuar.
Kush ishte Saimir Vishaj?
Saimir Vishaj ishte një nga emrat e njohur të avokatisë shqiptare. Vishaj kishte një karrierë të gjatë në fushën e drejtësisë, e cila nisi në vitin 1998.
Prej vitit 2009, ai drejtonte Shoqatën e Avokatëve Penalistë të Shqipërisë, ndërsa gjatë karrierës së tij ka mbajtur edhe disa funksione të tjera. Vishaj ka qenë edhe anëtar i Këshillit të Përgjithshëm Kombëtar të Dhomës Kombëtare të Avokatisë, i Komitetit të Disiplinës dhe i Komisionit të Monitorimit të Reformës në Drejtësi./ZËRI
