Putin gati për lëshime, garanci sigurie dhe shkëmbime tokash me Ukrainën
SHBA-Presidenti rus Vladimir Putin pranoi të lejojë garanci sigurie nga SHBA-ja për Ukrainën dhe bëri lëshime për "shkëmbimet e territoreve" si pjesë e një marrëveshjeje të mundshme paqeje gjatë samitit të tij me Presidentin e SHBA-së Donald Trump, tha për CNN i dërguari i lartë Steve Witkoff.
Putini ra dakord të lejojë “garanci të forta sigurie” për Ukrainën nga SHBA-të dhe një “rregullim legjislativ” nga Rusia që të mos hyjë në asnjë territor tjetër në Ukrainë apo diku tjetër në Evropë si pjesë e një marrëveshjeje përfundimtare paqeje, tha Witkoff.
Sipas të dërguarit, SHBA-të dhe vendet e tjera evropiane mund t’i ofrojnë Ukrainës diçka të ngjashme me marrëveshjen e “Nenit 5” të NATO-s. Anëtarësimi i Ukrainës në NATO ka qenë një vijë e kuqe për Rusinë.
Putini bëri gjithashtu lëshime në kërkesën e tij për “shkëmbime tokash” ukrainase gjatë takimit të tij me Trumpin, sipas Witkoff. Konkretisht Putini i ka kërkuar Ukrainës të tërhiqet nga Donbasi, i cili përbëhet nga Donetsku dhe Luhansku, në një masë më të madhe.
Donbasi është kryesisht rusishtfolës, dhe pasi Rusia pushtoi Krimenë në vitin 2014, forcat e saj të ndërmjetme fituan një pikëmbështetje atje në një luftë që nuk mori fund kurrë. Pak para se të niste pushtimin e tij në vitin 2022, Putini njohu të gjithë Luhanskun dhe Donetskun si të pavarur nga Ukraina, jo vetëm shtetet e vogla të krijuara nga përfaqësuesit e mbështetur nga Moska.
Komentet e Witkoff vijnë një ditë para se Presidenti ukrainas Volodymyr Zelensky të takohet me Trump në Shtëpinë e Bardhë. Ai do të shoqërohet nga një mori udhëheqësish evropianë, të cilët po shqyrtojnë gjithashtu garancitë e sigurisë për Ukrainën./ZËRI
Prag takimit me Zelenskyyn, Trump flet për përparim me Rusinë: Qëndroni gati!
SHBA- Presidenti amerikan Donald Trump ka reaguar pak më parë me anë të një postimi në rrjetin e tij ‘Truth’, duke deklaruar se është bërë një ‘progres i madh’ me Rusinë dhe se zhvillimet ishin në proces e sipër. Postimi i Trump erdhi ndërsa Zelenskyy dhe Von der Leyen po mbanin një konferencë për shtyp në Bruksel përpara takimit të tyre në Shtëpinë e Bardhë të martën.
“Progres i madh me Rusinë. Qëndroni në linjë. Presidenti DJT”, shkruan ai shkurtimisht në një postim në Truth me gërma kapitale.
Por nuk dha detaje të tjera se në cilën pikë të çështjes është arritur ky progres. Thuhet se gjatë takimit Putin i paraqiti Trumpit një ofertë paqeje që do të kërkonte që Ukraina të tërhiqej nga rajoni i Donetskut në Donbas, në këmbim të ngrirjes së vijave të frontit nga Rusia në Zaporizhzhia dhe Kherson.
Udhëheqësit evropianë do të zhvillojnë sot një video konferencë, përpara takimit të Volodymyr Zelenskyyt dhe Donald Trump në Shtëpinë e Bardhë./ZËRI
Takimi Trump! Von der Leyen shoqëron Zelenskyyn, pjesëmarrës Merz, Macron, Meloni dhe Stubb
SHBA- Janë udhëjeqësit europianë që do të jenë të pranishëm krah Volodymyr Zelenskyyt në Shtëpinë e Bardhë, për takimin që do të mbajë me Donald Trump. Presidentja e Komisionit Evropian, Ursula von der Leyen do të shoqërojë Volodymyr Zelenskyy në Uashington. Presidenti ukrainas do të takohet me Von der Leyen në Bruksel më vonë, përpara se të shkojnë në SHBA.
"Këtë pasdite, do të mirëpres Volodymyr Zelenskyn në Bruksel. Së bashku, do të marrim pjesë në Koalicionin e të Vullnetshmëve. Me kërkesë të Presidentit Zelenskyy, unë do t'i bashkohem takimit me Presidentin Trump dhe udhëheqës të tjerë evropianë në Shtëpinë e Bardhë nesër.”, ka shkruar Von der Leyen.
Ndërkohë emrat e tjerë që janë konfirmuar deri më tani janë kancelari i Gjermanisë, Friedrich Merz, kryeministrja italiane Giorgia Meloni, presidenti francez Emmanuel Macron dhe presidenti finlandez, Alexander Stubb, ndërkohë që nuk dihet nëse do të ketë udhëheqës të tjerë.
Ishte vetë Donald Trump ai që u bëri ftesë udhëheqësve evropianë për të marrë pjesë në takim. Më 15 gusht Trump dhe Putin mbajtën një samit në Anchorage të Alaskës, duke shënuar takimin e parë ballë për ballë midis dy udhëheqësve që nga fillimi i pushtimit të Ukrainës nga Rusia në shkurt të vitit 2022./ZËRI
Një dhuratë nga Trump dhe drekë në 'nder të shkëlqesisë së tij Vladimir Putin'! Zbardhen dokumentet sekrete
ALASKA-Dokumente të klasifikuara me simbole të Departamentit të Shtetit, të gjetura të premten në mëngjes në një hotel në Alaska, kanë zbuluar detaje të panjohura më parë në lidhje me takimin e 15 gushtit midis presidentit amerikan Donald Trump dhe presidentit rus Vladimir Putin.
Dokumentet u gjetën mëngjesin e samitit Trump-Putin nga një prej mysafirëve të hotelit, i cili më pas i dërgoi ato në faqen e internetit të NPR. Fletët mbanin detaje të sakta të kohës dhe vendndodhjes për fazat e ndryshme të takimit dypalësh (duke përfshirë emrat e dhomave në bazën ku u zhvillua), si dhe zbulonin se Trump kishte ndërmend t'i dhuronte një dhuratë bashkëbiseduesit të tij: një statujë tavoline të një "shqiponje tullace", simboli i Shteteve të Bashkuara.
Dokumentet përmbanin numrat e telefonit të tre anëtarëve të stafit të departamentit. Së fundmi, faqet 6 dhe 7 të paketës përshkruanin se si do të shërbehej dreka në samit dhe për kë. Një menu e përfshirë në dokumente tregonte se dreka do të mbahej "në nder të shkëlqesisë së tij Vladimir Putin", e cila u anulua më vonë: sallatë, fileto bifteku dhe peshk.
Po ashtu në dokumente tregohej se Putin dhe Trump duhej të uleshin përballë njëri-tjetrit gjatë drekës. Trump do të shoqërohej nga gjashtë zyrtarë: Sekretari i Shtetit Marco Rubio, Sekretari i Mbrojtjes Pete Hegseth dhe Shefja e Shtabit të Shtëpisë së Bardhë Susie Wiles në të djathtë të tij, dhe Sekretari i Thesarit Scott Bessent, Sekretari i Tregtisë Howard Lutnick dhe i Dërguari Special për Misionet e Paqes Steve Witkoff në të majtë të tij. Putin do të ulej menjëherë pranë Ministrit të tij të Punëve të Jashtme, Sergey Lavrov, dhe Ndihmësit të tij të Presidentit për Politikën e Jashtme, Yuri Ushakov.
Zëvendëssekretarja e shtypit e Shtëpisë së Bardhë, Ana Kelli, i minimizoi dokumentet duke i quajtur ato “një menu dreke me shumë faqe”, duke shtuar se nuk bëhej fjalë për ndonjë shkelje serioze të sigurisë./ZËRI
Ukraina pretendon përparim në fushëbetejë teksa Zelensky përgatitet për takim me Trump
UKRAINA-Presidenti ukrainas, Volodymyr Zelenskyy, ka pretenduar fitore në fushëbetejë në frontin lindor kundër forcave ushtarake ruse, teksa të dyja palët synojë të jenë në përparësi, para takimit të planifikuar të Zelenskyt me presidentin amerikan, Donald Trump, më 18 gusht, në Shtëpinë e Bardhë.
Takimi do të mbahet pasi Trump ka hequr dorë nga kërkesa e tij për armëpushim në luftë dhe ka thënë se palët duhet të negociojnë drejt një marrëveshjeje të plotë për paqe. Ky qëndrim nuk është në linjë me dëshirën e Kievit dhe aleatëve evropianë për një ndalje të shpejtë të luftimeve.
Ushtria ukrainase ka thënë më 16 gusht se i ka shtyrë forcat ruse rreth 2 kilometra përtej vijës së frontit, afër qytetit verilindor Sumi. Forcat ruse kanë kryer ofensivë së fundmi në këtë rajon, teksa tentojnë të zaptojnë më shumë territor në luftën kundër ushtrisë ukrainase që po përballet me mungesë armësh.
“Ushtarët ukrainas i vazhdojnë luftimet duke shkatërruar armikun dhe duke i çliruar vendbanimet tona”, ka thënë shefi i shtabit të përgjithshëm të ushtrisë ukrainase në Telegram.
“Avancimi i njësiteve ukrainase shkon prej 1 deri në 2.5 kilometra”.
Këto pretendime nuk janë verifikuar në mënyrë të pavarur.
Mirëpo, Zelensky ka thënë se nuk pret zbutje të ofensivës së Rusisë, teksa edhe Kremlini synon të regjistrojë fitore në kohën e rritjes së aktivitetit diplomatik, me qëllim të dhënies fund të lutës së nisur nga Rusia në Ukrainë më 2022.
Pavarësisht takimit të presidenti rus, Vladimir Putin me Trumpin në Alaskë, më 15 gusht, palët nuk janë pajtuar për një armëpushim dhe Moska i ka vazhduar suomet ajrore në disa qytete ukrainase.
Një ditë më vonë, Trump ka thënë se Kievi duhet të arrijë një marrëveshje me Moskën për dhënie fund të luftës, sepse “Rusia është fuqi shumë e madhe, dhe ata nuk janë”.
Shumë media perëndimore i kanë cituar disa burime të kenë thënë se Trump i ka thënë Zelenskyt që Putini ka propozuar ngrirjen e pjesës më të madhe të vijës së frontit, nëse Kievi ia dorëzon Rusisë gjithë rajonin e Donjeckut.
Zelensky, në anën tjetër, e përmend vazhdimisht se nuk pranon dorëzim territori dhe në këtë linjë janë edhe aleatët evropianë.
“Ligji ndërkombëtar është i qartë. Të gjitha territoret që janë pushtuar përkohësisht i përkasin Ukrainës”, ka thënë kryediplomatja e Bashkimit Evropian, Kaja Kallas më 10 gusht.
Rusia e ka pushtuar Gadishullin ukrainas të Krimesë dhe disa pjesë në lindje të Ukrainës më 2014 dhe tani e zotëron një të pestën e shtetit, përfshirë rajonin e Luhanskut dhe disa pjesë të Donjeckut, Zaporizhjas dhe Hersonit.
Ukraina dhe liderët evropianë kanë thënë se strategjia e Putinit që favorizon negociatat e gjata drejt një marrëveshjeje të plotë dhe refuzimi i një armëpushimi të shpejtë, i mundëson liderit rus të blejë kohë për ta ashpërsuar ofensivën në fushëbetejë.
Liderët e Britanisë, Francës dhe Gjermanisë pritet të zhvillojnë të dielën një takim virtual, për t’i diskutuar hapat e radhës përfundimit të luftës./REL
Paqe në horizont- Nesër takimi Trump-Zelenskyy! A do të ketë një përballje me Putin?
SHBA-Volodymyr Zelenskyy do të udhëtojë nesër për në SHBA, ku Presidenti i SHBA-së Donald Trump ka thënë se do t'i kërkojë udhëheqësit ukrainas të bjerë dakord për një marrëveshje paqeje. Trump gjatë ditës së nesër është planifikuar të takohet në Shtëpinë e Bardhë me Zelenskyyn dhe ka ftuar udhëheqësit evropianë të marrin pjesë.
Takimi me presidentin ukrainas vjen pas bisedimeve të Trump me Vladimir Putin. Trump tha se dëshiron të anashkalojë një armëpushim në Ukrainë dhe të kalojë direkt në një marrëveshje të përhershme paqeje pas takimit të tij me presidentin rus Vladimir Putin.
Trump gjatë një telefonate u tha udhëheqësve evropianë se dëshiron të organizojë një takim me Putinin dhe Zelenskyyn. Putin ende nuk e ka konfirmuar publikisht pjesëmarrjen e tij në samitin e propozuar.
Zelenskyy kaloi një kohë të vështirë në Shtëpinë e Bardhë në shkurt, kur Trump dhe zëvendëspresidenti i tij JD Vance e qortuan para medias, duke pretenduar se ai po “luante bixhoz me Luftën e Tretë Botërore”.
Thuhet se Putin i paraqiti Trumpit një ofertë paqeje që do të kërkonte që Ukraina të tërhiqej nga rajoni i Donetskut në Donbas, në këmbim të ngrirjes së vijave të frontit nga Rusia në Zaporizhzhia dhe Kherson. Rusia e pretendon Donbasin si territor rus, duke kontrolluar pjesën më të madhe të Luhanskut dhe rreth 70% të Donetskut.
Të premten, Trump dhe Putin mbajtën një samit në Anchorage të Alaskës, duke shënuar takimin e parë ballë për ballë midis dy udhëheqësve që nga fillimi i pushtimit të Ukrainës nga Rusia në shkurt të vitit 2022. Gjithashtu kjo shënoi herën e parë që Putini shkel në tokën amerikane për bisedime me një president amerikan që nga viti 2007./ZËRI
