U qëllua me vezë në Kuvend, Kurti: Nëse ky është çmimi për t'u ulur për marrëveshje, jam i lumtur ta paguaj (VIDEO)
KOSOVË- Kryeministri në detyrë i Kosovës, Albin Kurti, ka reaguar pas ndërprerjes së seancës konstituive të Kuvendit dhe incidentit ku u godit me vezë.
Sa i përket incidentit në Kuvend, Kurti deklaroi se është i gatshëm të përballet edhe me veprime të tilla, nëse ato do të shërbejnë për arritjen e një marrëveshjeje politike.
“Vazhdimi i seancës përcaktohet nga kryesuesi i seancës e cila ka filluar, por përfundon atëherë kur të zgjidhet kryetari dhe 5 nënkryetarët. Edhe nëse bëhen aksione të tilla kundër meje, unë nuk jam këtu për veten time, jam për Kosovën, kërkojnë të ulemi bashkë dhe për Kosovën të bëjmë marrëveshje. Nëse gjuajta me vezë dhe goditja e pantallonave të kryeministrit, është çmimi që unë duhet të paguajë në mënyrë që ata të ulen e të bisedojmë, jam i lumtur ta paguaj. Vetëm të vijnë në takim. Unë nuk ankohem që ata hedhin vezë, unë ankohem që ata s’duan të takohen”, tha Kurti.
Duke folur për mediat, Kurti tha se Lëvizja Vetëvendosje nuk propozoi kandidat për kryetar të Kuvendit, pasi sipas tij, pa një marrëveshje për zgjedhjen e presidentit, çdo emër do ta çonte vendin drejt zgjedhjeve të reja.
“Nuk propozuam emër, sepse çfarëdo emri pa marrëveshje për president, do të na shpinte te zgjedhjet e reja, të përsëritura, të parakohshme, të panevojshme dhe të dëmshme”, deklaroi Kurti.
Në nisje të seancës së konstituimit në Kuvendin e Kosovës, kryeministri Albin Kurti u godit me vezë nga deputetja e Aleancës për Ardhmërinë e Kosovës (AAK), Time Kadrijaj, në kohën kur po fliste në foltore.
Kadriaj sulmoi Kurtin me vezë, pas deklaratave të këtij të fundit për nevojën e kohës shtesë për përfundimin e procesit të konstituimit të Kuvendit./ZËRI
Seanca në Kuvendin e Kosovës, plas sherri mes deputetëve, Kurti goditet me vezë (VIDEO)
KOSOVË- Ka nisur punimet vazhdimi i seancës konstituive të legjislaturës së 11-të. Seanca konstituive e Kuvendit të Kosovës ka nisur me tensione dhe përplasje mes deputetëve.
Menjëherë pas rifillimit të punimeve, situata në sallën e Kuvendit është përshkallëzuar, pasi deputetja e AAK, Time Kadrijaj ka goditur me vezë drejt kryeministrit në detyrë, Albin Kurti.
Seanca, e cila kishte nisur më 6 gusht dhe u ndërpre për shkak të ngërçit politik, po drejtohet nga kryesuesi Avni Dehari. Në sallë janë të pranishëm 109 deputetë.
Pavarësisht tensioneve, seanca po vijon, ndërsa mbetet për t’u parë nëse Kuvendi do të arrijë të vijojë me rendin e ditës dhe të përfundojë procesin e konstituimit.
Vazhdimi i seancës konstituive, Kurti: Më ka ftuar Dehari, i përgjigjem pozitivisht (VIDEO)
KOSOVË- Kryeministri në detyrë i Kosovës, Albin Kurti, do të jetë i pranishëm në Kuvend për vijimin e seancës konstituive.
Para hyrjes në sallën e Kuvendit, Kurti nuk komentoi zhvillimet e fundit, ndërsa theksoi se pjesëmarrja e tij lidhet me thirrjen e bërë nga drejtuesi i seancës, Avni Dehari. Kurti deklaroi se kishte vendosur t’i përgjigjej ftesës së Deharit për vazhdimin e seancës.
“Kryesuesi i seancës konstitutive, deputeti më i moshuar Avni Dehari, e ka ftuar për sot vazhdimin e seancës dhe unë kësaj po i përgjigjem”, deklaroi Kurti për mediat para hyrjes në Kuvend.
Kuvendi i Kosovës nuk u konstitua brenda afatit, seanca vazhdon sot
KOSOVË- Kuvendi i Kosovës do të vijojë sot në orën 11:00 seancën konstituive, pasi dështoi të konstituohet brenda afatit 30-ditor të përcaktuar nga Gjykata Kushtetuese. Në rendin e ditës janë zgjedhja e kryetarit të Kuvendit dhe e nënkryetarëve.
“Të shtunën, më 8 gusht 2026, në orën 11:00, vazhdon seanca konstituive e Legjislaturës XI të Kuvendit të Republikës së Kosovës. Rendi i ditës: 3. Zgjedhja e Kryetarit të Kuvendit; 4. Zgjedhja e nënkryetarëve të Kuvendit.”, thuhet në njoftimin e Kuvendit.
Vendimi për vijimin e seancës u mor një ditë më parë nga kryesuesi i seancës konstituive, deputeti i Lëvizjes Vetëvendosje, Avni Dehari.
Njoftimi për zhvillimin e seancës sot në orën 11:00 erdhi pak orë pas një tjetër takimi pa rezultat mes kryeministrit në detyrë, Albin Kurti, dhe kryetarit të Lidhjes Demokratike të Kosovës (LDK), Lumir Abdixhiku, në përpjekje për arritjen e një marrëveshjeje politike.
Seanca konstituive e së enjtes nuk u zhvillua dhe u shty për një kohë ta pacaktuar, pas kërkesës së Kurtit për më shumë kohë për bisedime me partitë e tjera.
Ndërkohë, afati kushtetues përfundoi në mesnatë. Seanca e Kuvendit u zhvillua deri pas mesnatës, ndërsa deputetët nuk arritën ta përfundojnë procesin e konstituimit brenda afatit. Pak orë para përfundimit të afatit, Kurti dërgoi letër kryetarit të PDK-së, Bedri Hamza, duke iu ofruar partisë së tij postin e kryetarit të Kuvendit, në këmbim të mbështetjes së tyre për Presidentin.
Seanca e sotme pritet të vijojë aty ku mbeti, me procedurën për zgjedhjen e kryetarit të Kuvendit dhe pesë nënkryetarëve. Megjithatë, mbetet për t’u parë nëse opozita do të marrë pjesë në votim dhe nëse do të ketë dakordësi për përfundimin e procesit të konstituimit të Kuvendit./ZËRI
