TIRANË- Avokatët e Erion Veliaj janë vënë menjëherë në lëvizje pasi Presidenti i Republikës, Bajram Begaj dekretoi zgjedhjet për Bashkinë e Tiranës. Burime bëjnë me dije se pala mbrojtëse e Veliajt do t'i drejtohet Kushtetuese, si e vetmja gjykatë që i jep zgjidhje çështjes. Mbrojtja e Veliajt do të dërgojnë dekretin në Kushtetuese, duke kërkuar pezullimin e tij e më pas shpalljen anti-kushtetues.
“Nëse do të interpretojmë që neni 62 i ligjit organik shton shkaqe të tjera veç atyre që përcakton Kushtetuta, kjo është antikushtetuese, sepse vete neni 115 nuk përmban shprehjen “shkaqe të tjera përcaktohen me ligj”, thotë burimet për media.
Presidenti Bajram Begaj dekretoi sot zgjedhjet për Bashkinë e Tiranës, pavarësisht se Erion Veliaj ka ankimuar në Gjykatën Kushtetuese shkarkimin. Lidhur me këtë, Presidenca sqaroi në njoftimin e saj se: "Për VKM nr.539, datë 25.09.2025 nuk zbatohet juridiksioni kushtetues për të drejtën e ankimit, por juridiksioni gjyqësor administrativ." Pra, shkarkimi i Veliajt duhet të trajtohet nga Gjykata Administrative dhe jo nga Gjykata Kushtetuese.
Zgjedhjet e pjesshme në 6 bashki të vendit, përfshi dhe Tiranën, do të mbahen më datë 9 nëntor. Bashkitë që do të hyjnë në zgjedhje të parakohshme janë Tiranë, Vlorë, Berat, Mat, Cërrik dhe Tepelenë. Në tre bashki Berat, Mat dhe Tepelenë, kryetarët dhanë dorëheqjen për tu bërë deputetë./ZËRI
