TIRANË- Votat e diasporës po rikthehen në Shqipëri. Që nga nisja e shpërndarjes deri më sot, në Shqipëri janë kthyer 27% e votave të emigrantëve. Afati i fundit për dorëzimin e fletëve të votimit është data 11 maj 2025, ora 19:00. Deri tani, janë mbi 193 mijë zarfe të shpërndara nga Komisioni Qendror i Zgjedhjeve. Por mbrapsht janë sjellë gati 50 mijë fletë votimi.
"Rreth 27 % e fletëve të votimit të dërguara tek zgjedhësit që jetojnë jashtë territorit të Shqipërisë, tashmë janë kthyer në KQZ Shqipëri,"-bën me dije KQZ.
Votat e ardhura nga diaspora do të administrohen dhe numërohen në Pallatin e Sportit “Feti Borova”, pranë Parkut Olimpik në Tiranë.
Në total janë 245,975 shqiptarë që jetojnë jashtë vendit, të cilët do të ushtrojnë të drejtën e votës. Për herë të parë, emigrantët do të votojnë me postë për zgjedhjet parlamentare që do të mbahen më 11 maj./ZËRI
