TIRANË- Kryeministri Edi Rama ka zhvilluar sot një takim të paralajmëruar me kryebashkiakët e vendit, me çështje kryesore përshpejtimin e procesit të legalizimit, por që më pas devijoi më së shumti në një fjalim të Ramës për sezonin turistik. Në këtë mbledhje, e cila ishte njoftuar prej disa ditësh, u vu re mungesa e kryebashkiakut të Tiranës Erion Veliaj.
Sipas burimeve nga zyra e shtypit pranë bashkisë së Tiranës, Veliaj ka pasur një aktivitet në Bashki, ku i ka dorëzuar çelësin e qytetit ish-ambasadorit të SHBA-ve në vendin tonë, Aleksandër Arvizu. Ky i fundit ka shërbyer për një mandat si ambasador i SHBA-ve në vendin tonë, për t’u larguar në vitin 2017.
Prej disa kohësh përflitet për një krisje të marrëdhënieve mes Ramës dhe Veliajt, edhe për shkak të hetimeve që janë ndërmarrë së fundi nga SPAK për inceneratorin e Tiranës, ku Veliaj është marrë në pyetje si një person në dijeni. /ZËRI
