BUENOS AIRES- Këngëtari i famshëm dhe ish-anëtari i grupit "One Direction" ka ndërruar jetë në moshën 31-vjeçare, pasi u rrëzua nga ballkoni i hotelit në Buenos Aires në Argjentinë. Payne ndodhej në Argjentinë, pasi shkoi në koncertin e Niall Horan, ish-anëtari tjetër i bandës 1D. Payne ka lënë pas djalin e tij 7-vjeçar, Bear, të cilin e ka sjellë në jetë nga një marrëdhënie me Cheryl Ann Tweedy. Lidhur me ngjarjen, Policia argjentinase thanë se ata morën një telefonatë nga stafi i hotelit se një nga klientët duket se është në gjendje të dehur ose të droguar, dhe po shkaktonte dëme në dhomën e tij të hotelit. Disa minuta pasi Policia mbërrin në vendngjarje, Payne bie nga ballkoni i dhomës së tij, ku për shkak të dëmtimeve ndërron jetë. Dhe ishte pikërisht kjo ajo që stafi i trembej, "dhoma ku klienti ynë ndodhet ka ballkon dhe mund të rrëzohet..."
TELEFONATA:
911 ku është urgjenca juaj?
Telefonuesi: Përshëndetje.
911, cila është urgjenca juaj?
Telefonuesi: Përshëndetje, mirëdita, shikoni po ju telefonoj nga hoteli CasaSur Palermo, i cili ndodhet në Kosta Rika [St] 6032.
6032? A është ajo midis Cramer [St] dhe…
Telefonuesi: Po, është e saktë, është midis Arévalo [St] dhe Dorrego [St]. Pra, ne kemi një mysafir që është shumë i droguar dhe që po e rrënon dhomën. Erm, kështu që ne kemi nevojë për dikë që të vijë.
Disa pamje po qarkullojnë në rrjetin social "X" se janë shkrepur në dhomën e këngëtarit, por këto nuk janë verifikuar zyrtarisht. Madje, nga disa burime jozyrtare që ende nuk janë konfirmuar Policia po heton nëse ishte vetëvrasje apo Payne u hodh nga dikush. Sipas disa personave, Payne dërgoi një audioregjistrim një personi, ku dukej qartë se ishte i nervozuar dhe më pas filloi të shkatërronte dhomën e tij.
Liam Payne u shfaq për herë të parë për publikun në moshën 14-vjeçare ku mori pjesë në X Factor 2008 me këngën “Fly Me to the Moon” nga Frank Sinatra, por nuk u pranua përshkak të dialektit të tij. Kjo nuk e bëri atë të hiqte dorë nga ëndrra e tij, pasi sërish në vitin 2010, kur ishte vetëm 16-vjeç, mori sërish pjesë në X Factor, ku dhe u bë pjesë e grupit të famshëm One Direction. Këtu nis dhe fama për të dhe anëtarët e tjerë të grupit. Banda theu rekorde botërore dhe shpejt u kthye në një nga grupet më të dashur në botë. 1D përfshinte 5 anëtarë Harry Styles, Louis Tomlinson, Niall Horan dhe Zayn Malik, por në vitin 2015, Malik braktisi grupin dhe në vitin 2016, 1D lajmëroi se ata do të pezullonin aktivitetet e tyre, për një kohë të pacaktuar. One Direction mbetet një nga grupet që ka shitur më shumë kopje të albumeve të të gjitha kohërave, duke shitur më shumë se 70 milionë disqe në mbarë botën.
Deri më tani, fansat në botë kanë pritur bashkimin e grupit, por pas kësaj tragjedie, kjo nuk do të ndodhë kurrë…
Asnjë nga anëtarët e mëparshëm të grupit nuk kanë komentuar për vdekjen e tij dhe nuk ju janë përgjigjur pyetjeve të mediave.
“Fama e shkatërroi atë”
Fama ndikoi rëndë në jetën e tij personale.
"Kur jeni duke bërë qindra e qindra koncerte dhe janë të njëjtat 22 këngë në të njëjtën kohë çdo ditë, edhe nëse nuk jeni të lumtur, duhet të vazhdosh të bësh këtë gjë. Është pothuajse si të vesh kostumin e Disney-t para se të ngjitesh në skenë dhe nën kostumin e Disney-t unë isha i dehur shumë herë sepse nuk kishte asnjë mënyrë tjetër për të kuptuar se çfarë po ndodhte. Dua të them, ishte argëtuese. Ne patëm një shpërthim absolut, por kishte disa pjesë të famës ku thjesht u bë pak toksike,”- tha Payne për Men's Health Australia në vitin 2019. Ai tha se pinte shpesh alkool para se të dilte në skenë në përpjekje për të menaxhuar stresin.
Payne publikoi albumin e tij debutues solo "LP1" në 2019 dhe tha në 2023 se ishte duke punuar në albumin e tij të dytë. Në mars të atij viti, ai publikoi këngën "Teardrops", një këngë që ai tha se ishte "krijuar nga shumë lot.”
Payne planifikoi të mbante një turne botëror nga ku do të niste prej Amerikës së Jugut në shtator 2023, por iu desh të shtynte datat sepse pësoi një infeksion në veshka, sëmundje kjo që ai ka vuajtur që prej fëmijërisë.
Fama ndikoi për keq tek ai, madje ishte një person që kthehej në objektiv të bullizimeve prej fansave dhe komenteve negative. Madje ish-partnerja e tij, pas ndarjes tregoi publikisht gjëra nga jeta e tij personale, ku ai u bullizua edhe më keq, madje para se rrjetet e tij sociale të mbusheshin me komente ku urojnë që ai të prehet në paqe, aty mund të gjeje komente që i kërkonin atij të vriste veten dhe se ai ishte një njeri i ulët që kërkonte famë.
Vetëm disa ditë më parë ai postoi një foto me Horan, ku shumë fansa u shprehën të lumtur që dy shokët, dikur në të njëjtën bandë, po kalonin një kohë të mirë së bashku, por po ashtu ai u përball me shumë bullizime në internet për shkak të kësaj fotografie. Ai ndodhej në Buenos Aires së bashku me të dashurën e tij Kate Cassidy, ku dhe postoi së bashku me të duke kërcyer në koncertin e Niall Horan, por kjo video nuk u prit mirë nga shumë fansa që filluan të shkruanin komente negative për të dhe se ai kërkon vëmendje.
Payne, vetëm disa orë para vdekjes së tij, postoi një video ku tha se është një ditë e bukur në Argjentinë.
“Homazhe”
Vdekja tragjike e Payne i ka lënë fansat dhe industrinë e muzikës të tronditur, me nderimet e të famshmëve që komentuan nga të gjitha anët e botës. Lajmi u shpërnda në faqet e para të shumicës së gazetave në Mbretërinë e Bashkuar të enjten në mëngjes. Në një postim në Instagram, nëna e Harry Styles, Anne Twist, postoi një imazh të një emoji me zemër të thyer, me mbishkrimin "Ai ishte vetëm një fëmijë".
Në një tjetër homazhe në Instagram, ish-prezantuesi i X Factor, Dermot O'Leary tha: E mbaj mend atë si një 14-vjeçar që erdhi në audicion në The X Factor dhe na mahniti duke kënduar Sinatran. Ai thjesht pëlqente të këndonte. Ai ishte gjithmonë një njeri i lumtur, kishte kohë për të gjithë, i sjellshëm, mirënjohës dhe ishte gjithmonë i përulur.
Homazhe për Payne është mbajtur edhe jashtë hotelit në Buenos Aires. Fansat ndezën qirinj dhe kënduan këngën e One Direction "Infinity".
Payne ka lënë pas djalin e tij Bear, të cilin e kishte me ish-anëtaren e grupit Girls Aloud, Cheryl Cole. Cole është një ish-gjyqtare e X Factor e cila ishte e pranishme në të dy audicionet e Payne në X Factor. Çifti konfirmoi se ata ishin ndarë në vitin 2018, por kishin marrëdhënie të mira për djalin e tyre.
Por tashmë duket se industria e muzikës ka rënë në heshtje, pasi një yll u shua pa shkëlqyer ende…/ZËRI
