BRITANI E MADHE- Vetëm 6 javë pasi iu nënshtrua një operacioni për kancerin e gjirit në fazën e hershme, Jessie J u rikthye papritur në spital. Këngëtarja e “Price Tag” ndau detaje të episodit shqetësues përmes story-ve të saj në Instagram, duke e shoqëruar mesazhin me një foto në të cilën shihet e lidhur me një injeksion intravenoz.
"Gjashtë javë pas operacionit, isha përsëri në të njëjtën dhomë ku isha edhe pas operacionit. Ishte e papritur dhe e paplanifikuar."- shkroi artistja 37-vjeçare, e cila zbuloi diagnozën e saj me kancer në qershor. Edhe pse simptomat fillimisht tregonin për një mpiksje të mundshme gjaku në mushkëri, këngëtarja britanike sqaroi me lehtësim: Nuk është ky rasti, faleminderit Zotit!
Mjekët kryen disa teste dhe dyshuan se mund të ishte "pak lëng" në mushkëri, përveç një infeksioni të paidentifikuar.
"Po kam vështirësi në frymëmarrje të thellë, por më lanë në shtëpi mbrëmë. E urrej të rri në spital", rrëfeu ajo, duke vënë në dukje se do të vazhdojë testet mjekësore si paciente ambulatore. Këngëtarja, e njohur edhe për hitet si “Domino” dhe “Bang Bang”, reflektoi mbi vendimin e saj për t’u larguar nga spitali me vullnetin e saj të lirë.
"E di që shumë njerëz që e kanë kaluar këtë ose diçka të ngjashme mund të pajtohen me mua ose jo, dhe kjo është në rregull. E di që, për mua, sfida e vërtetë fizike e gjithë kësaj ishte dita kur shkova në operacion. Rimëkëmbja, fizikisht, nuk është aspak e shpejtë ose e lehtë,"-vuri në dukje ai.
Në postimin e saj më të fundit, artistja foli edhe për ndikimin që sëmundja e saj ka pasur në jetën e saj profesionale.
“Të ndryshoj planet e karrierës për këtë vit ka qenë frustruese pasi kam punuar kaq shumë për të arritur deri këtu dhe jam e emocionuar për ta bërë gjithçka. Është gjithë jeta ime,”- tha ajo.
Pavarësisht ritmit të ngadaltë të rikuperimit dhe ndërlikimeve të paparashikuara, Jessie J e mbyll reflektimin e saj me një notë pranimi: Ky nuk është një rikuperim i shpejtë, as nuk duhet të jetë. Ky ritëm i ngadaltë ka qenë një realitet i vështirë për t’u pranuar. Më pëlqen të lëviz, të punoj dhe të jem aktive, por nuk mundem tani, dhe kështu është situata./ZËRI
