TIRANË- Vetëm 2 ditë më parë, ZËRI vuri në pah dhe ngriti shqetësimin për mungesën e reagimit institucional ndaj pamjeve të publikuara në rrjetet sociale, ku Jozefin Marku dyshohet se dhunon Eduard Kuçin, ndërsa sot raportohet arrestimi i këngëtarit.
Këngëtari Joz Marku është shoqëruar këtë të shtunë në polici. Burime bëjnë me dije se bashkë me Markun është shoqëruar edhe një person tjetër i përfshirë në këtë ngjarje. Arrestimi i tij vjen pas publikimit të pamjeve që kanë qarkulluar në rrjetet sociale dhe që kanë shkaktuar reagime të shumta, ndërsa rrethanat e plotë të ngjarjes pritet të hetohen dhe konfirmohen nga autoritetet.
Nga hetimet e deritanishme rezulton se video është regjistruar në Tiranë tek mbikalimi i Rinasit. Në pamje shfaqet këngëtari Jozefin Marku me disa persona të tjerë, të cilët pasi i bëjnë shenjë për të ndaluar duke përdorur tabelën e policisë së shtetit Edi Kuçit, teksa ky i fundit lëvizte me mjetin e tij McLaren, e nxjerrin nga makina dhe e dhunojnë. Ndërkohë, mësohet se janë sekuestruar pamjet e kamerave të sigurisë në zonë dhe po punohet për identifikimin e personave që shfaqen në video.
Megjithatë, vlen të theksohet se video e dhunës po bën xhiron e rrjetit prej disa ditësh, ndërsa deri më sot, autoritetet nuk kishin ndërmarrë hapa lidhur me ngjarjen.
Ndërkohë, një ditë më parë, në Kosovë, Prokuroria Themelore në Pejë njoftoi hapjen e rastit penal lidhur me ngjarjen. Në Shqipëri, deri më tani, nuk kishte pasur një reagim publik të bërë të ditur nga autoritetet për këtë ngjarje.
-
Ku i buron fuqia Joz Markut?
3 Shtator, 18:22
Lidhur me këtë situatë dhe ngjarje që po shpërndahej e komentohej gjerësisht në rrjet, ZËRI ngriti shqetësimin për mungesën e reagimit institucional dhe përgjegjësinë, duke shtruar edhe pyetjen: “Ku i buron fuqia Joz Markut?”/ZËRI
