SHBA- Aktori amerikan Jesse Eisenberg, i njohur për rolet në filmat “Now You See Me” dhe “The Social Network”, ka surprizuar publikun duke njoftuar se do të dhurojë njërën nga veshkat e tij për një marrës të panjohur.
Gjatë një interviste në emisionin televiziv “Today”, më 30 tetor, Eisenberg e përshkroi vendimin si një gjest altruist dhe të ndërgjegjshëm. “Do ta dhuroj veshkën time pas gjashtë javësh. E them me bindje,” tha aktori, duke shtuar me humor: “Kam aq shumë gjak brenda meje sa ndiej sikur duhet ta jap. Më pëlqen shumë ta bëj dhe nuk e di pse.”
Prezantuesi Craig Melvin e përgëzoi për vendimin, duke e quajtur “një hap të madh”, duke vënë në dukje përvojën e Eisenberg me dhurimin e gjakut më parë. Aktori sqaroi se transplanti do të kryhet në mesin e dhjetorit si pjesë e një dhurimi altruist për një person që ka nevojë për organin.
Sipas Weill Cornell Medicine, dhurimi altruist i organeve është një proces ku një individ vendos të dhurojë një organ për një marrës të panjohur, i zgjedhur bazuar në përputhshmërinë mjekësore.
Eisenberg shtoi: “Është një vendim pa rrezik dhe jashtëzakonisht i nevojshëm. Mendoj se njerëzit do ta kuptojnë se është një dhuratë që mund të bëjnë, nëse kanë kohën dhe dëshirën.”
Sipas Klinikës Mayo, shumica e donatorëve mund të rikthehen në aktivitetet e tyre të përditshme brenda dy deri në katër javësh pas dhurimit. Vetëm në Shtetet e Bashkuara, çdo vit regjistrohen rreth 5,000 dhurime veshke nga persona të gjallë./ZËRI
