ANGLI - Everton ka marrë një zbritje të menjëhershme prej 10 pikësh, pasi u zbulua se kishte shkelur rregullat financiare të Premier League.
Dënimi është sanksioni më i madh sportiv në historinë e kompeticionit dhe e lë Evertonin në vendin e 19-të në tabelë me një total prej katër pikësh.
Klubi tha se ishte i tronditur dhe i zhgënjyer nga vendimi krejtësisht joproporcional dhe i padrejtë. Everton ka thënë se do të apelojë kundër vendimit.
Premier League e referoi Evertonin në një komision të pavarur në mars, por në atë kohë nuk zbuloi specifikat e shkeljes së pretenduar të klubit.
Everton raportoi humbje financiare për të pestin vit radhazi në mars, pasi tha se ka një deficit prej 44.7 milionë paundësh në 2021-2022.
Klubet e Premierligës lejohen të humbasin 105 milionë paundë gjatë një periudhe trevjeçare dhe Everton pranoi se ka shkelur rregullat financiare për periudhën 2021-2022.
Pas një seance dëgjimore pesë-ditore në tetor, komisioni gjeti se humbjet e Evertonit gjatë asaj periudhe arritën në 124.5 milion £.
Në një deklaratë, Everton tha: “Ashpërsia e sanksionit të vendosur nga komisioni nuk janë pasqyrim i drejtë dhe as i arsyeshëm i provave të paraqitura”.
Zbritja e pikëve vjen në një kohë pasigurie të konsiderueshme te Everton. Në shtator, pronari Farhad Moshiri ra dakord t'i shiste 94% të aksioneve të tij në klub, fondit amerikan të investimeve 777 Partners.
Duke shpjeguar pse zbritja e pikëve të Evertonit ishte kaq e lartë, komisioni tha në arsyet e tij se klubi ka bërë shpenzime të tepërta - kryesisht për lojtarët e rinj. Përfundimi i klubit në vendin e 16-të në vitin 2021-2022 shkaktoi një humbje të të ardhurave të pritshme prej rreth 21 milion £.
Komisioni shtoi: "Dëshira e kuptueshme e Evertonit për të përmirësuar performancën e tij në fushë (për të zëvendësuar mesfushën inekzistente) e bëri atë të rrezikonte. Përmirësimi rezultoi në tejkalimin e pragut prej 105 milionë paundësh me 19.5 milionë paund”./Zëri.ai/
