AUSTRI-Trajneri Sylvinho doli sot në konferencën për shtyp, në lidhje me përgatitjet e kombëtares shqiptare për Euro 2024. Sylvinho u shpreh se po përgatit sa më mirë lojtarët, që të japin kontributin e tyre për kombëtaren e Shqipërisë.
"Këtu është një atmosferë shumë e mirë. Donim që ta nisnim në Tiranë, për të ndier atmosferën dhe entuziazmin e njerëzve. Kemi 3-4 ditë që kemi nisur fazën përgatitore. Kemi Seferin që luajti në datën 29 maj, kemi Abrashin që ka luajtur së fundmi, mbrëme u bashkua me grupin. Kemi edhe kapitenin Gjimshiti që ka një ndeshje për të luajtur. Do të bashkohet nesër me ne. Po përgatitemi sa më mirë për Euro 2024. Kam parë motivimin e duhur te skuadra. Nuk na mungon karikimi dhe motivimi, kjo është një gjë shumë e bukur. Kemi lojtarë me karakteristika të ndryshme. Nesër, me shumë mundësi do e kemi grupin të plotë. Ka lojtarë që kanë ardhur nga shumë ndeshje. Nuk po them që janë të lodhur, por duhet t’i menaxhojmë mirë. Si edhe ata që nuk kanë luajtur shumë. Euro 2024 është turne i shpejtë dhe dinamik. Duhet të përgatitim sa më mirë lojtarët, që të japin kontributin e tyre për kombëtaren e Shqipërisë. Duhet të përgatitim të gjithë lojtarët, të gjithë, dhe të aktivizojmë më pas më të mirët,"-u shpreh ai.
Gjithashtu braziliani pati edhe një komet të shkurtër sa i përket listës së lojtarëve të gjedhur nga ai. Në listën me 27 emra shihet se mungon Sokol Cikalleshi dhe Myrto Uzuni, ndërsa është rikthyer Armando Broja.
"Lista? Nuk kam kohë të shoh se çfarë thuhet në publik. Kam shumë ngarkesë dhe punë për të bërë. Nuk arrij të jem në gjendje të ndjek debatet që bëhen. Secili ka mendimin e vet për listën” – tha ai.
Lista e plotë përbëhet nga: Portierë: Etrit Berisha, Thamas Strakosha, Elhan Kastrati dhe Simon Simoni. Mbrojtësit e grumbulluar: Berat Gjimshiti, Elseid Hysaj, Ivan Balliu, Ardian Ismajli, Arlind Ajeti, Naser Aliji, Enea Mihaj, Mario Mitaj dhe Marash Kumbulla Mesfushorët e grumbulluar: Amir Abrashi, Kristjan Asllani, Nedim Bajrami, Medon Berisha, Klaus Gjasula, Qazim Laçi, Ernest Muçi dhe Ylber Ramadani, Sulmues: Armando Broja, Jasir Asllani, Mirlind Daku, Arbër Hoxhaj, Rey Manaj dhe Taulant Seferi.
/ZËRI
