ROMË- Marrëveshja për emigrantët duket se ka marrë goditjen e radhës nga Gjykata e Romës. Gjykata pezulloi qëndrimin e 7 emigrantëve në Shqipëri dhe e dërgoi çështjen për gjykim në Gjykatën Europiane të Drejtësisë.
Emigrantët që erdhën me anijen “Libra” në vendin tonë nuk mund të qëndrojnë më në Kampin e Gjadrit, dhe do të kthehen sërish në Brindizi pas disa orësh. Media italiane TGcom24 shkruan se zëvendëskryeministri Matteo Salvini, e quajti këtë një tjetër dënim politik kundër qeverisë, si dhe kundër italianëve dhe sigurisë së tyre.
Artikulli i plotë:
Seksioni i Emigracionit në Gjykatën e Romës ka referuar çështjen e emigrantëve të mbajtur në qendrën në Shqipëri në Gjykatën Evropiane të Drejtësisë, duke pezulluar masën e ndalimit. Vendimi ka të bëjë me shtatë emigrantë, egjiptianë dhe bangladeshas, të cilët tashmë ndodhen brenda qendrës për riatdhesim në Gjadër, në Shqipëri dhe për rrjedhojë do të kthehen në Itali.
Me përfundimin e afateve të vlefshmërisë, shtatë emigrantët do të duhet të largohen nga qendra e Gjadrit. Teksti i dispozitës së Seksionit XVIII të Imigracionit të Gjykatës së Romës “e referon çështjen në Gjykatën e Drejtësisë së Bashkimit Evropian, në përputhje me nenin 267 TFEU” dhe “pezullon aktgjykimin aktual të vlefshmërisë pa cenuar efektet e ndalimit të përkohshëm të urdhëruar nga administrata me ligj”. Referenca, konkretisht, është te neni 6 i dekretit 142/2015 dhe te neni i Protokollit të Shqipërisë.
Duhet theksuar se kriteret për përcaktimin e një shteti si vend të sigurt të origjinës përcaktohen nga ligji i Bashkimit Evropian. Prandaj, pa cenuar prerogativat e ligjvënësit kombëtar, gjyqtari ka për detyrë të verifikojë gjithmonë dhe konkretisht – si në çdo sektor tjetër të sistemit juridik – zbatimin korrekt të së drejtës së Bashkimit Evrooian, i cili mbizotëron mbi ligjin kombëtar kur është i papajtueshëm me të, siç parashikohet edhe nga Kushtetuta italiane. /ZËRI
