TIRANË-Protestuesi Erlis Sina, i cili ishte në mesin e disa qytetarëve që qëndruan gjithë natës para Kryeministrisë, i është përgjigjur mesazhit publik që i drejtoi kryeministri Edi Rama, ndërsa publikoi edhe një foto të tij. Rama krahas fotos së ndarë të Sinës, u shpreh se sheh veten dhe i bërti thirrje të mos lejojë që pakënaqësitë e tij të përdoren kundër interesave të vendit dhe e ftoi të dialogojë me institucionet.
Në një përgjigje të publikuar në rrjetet sociale, Sina shprehet se nuk pranon të barazohet me figurën e kreut të qeverisë dhe e konsideron atë përgjegjës për problemet që, sipas tij, i kanë nxjerrë qytetarët në protestë. Qytetari e akuzon Ramën, për nxitjen e emigrimit të të rinjve, padrejtësi sociale dhe mungesë të perspektivës në vend. Ai argumenton se pakënaqësia qytetare nuk buron nga manipulimet politike apo ndikimi i rrjeteve sociale, por nga vështirësitë e përditshme me të cilat përballen qytetarët.
Sina thekson se ata që marrin pjesë në protestë nuk dalin në shesh për shkak të ndikimit të algoritmeve, influencerave apo forcave politike, por sepse përballen çdo ditë me vështirësi reale.
Protestuesi Erlis Sina:
Pergjigje e detyruar per Edi Ramen!
UNË NUK JAM TI!
Mos më thuaj se te fotografia ime sheh veten tënde.
Unë nuk jam ti.
Unë nuk jam ai që ka pushtetin prej vitesh në dorë.
Nuk jam ai që firmos vendime që ndryshojnë jetët e njerëzve.
Nuk jam ai që kontrollon institucionet, buxhetet dhe fatet e këtij vendi.
Ti je.
Prandaj mos guxo të më thuash se halli im është si halli yt.
Ti nuk je viktima e halleve të mia.
Ti je autori i tyre.
Je autori i emigrimit të mijëra të rinjve që nuk panë më të ardhme në Shqipëri.
Je autori i padrejtësive që i detyrojnë njerëzit të largohen nga vendi i tyre.
Je autori i arrogancës së një pushteti që nuk dëgjon më askënd përveç vetes.
Kur thua se ke frikë nga ata që mund t’i bëjnë keq Shqipërisë, harro një gjë:
Nuk ka humnerë më të thellë se vjedhja e votës.
Nuk ka humnerë më të thellë se grabitja e pronës.
Nuk ka humnerë më të thellë se shkatërrimi i dinjitetit.
Nuk ka humnerë më të thellë se vjedhja e së ardhmes së një brezi të tërë.
Mijëra njerëz nuk mbushin sheshet sepse i manipulon algoritmi.
Nuk protestojnë sepse ua kërkojnë influencerat.
Nuk zemërohen sepse ua dikton opozita.
Ata dalin në shesh sepse jetojnë realitetin çdo ditë.
Sepse paguajnë faturat.
Sepse kërkojnë punë.
Sepse presin në spitale.
Sepse shohin fëmijët të largohen.
Sepse ndihen të huaj në vendin e tyre.
Dhe kur ti përpiqesh t’i paraqesësh si turmë të përdorur, nuk po i kupton.
Po i përçmon.
Fotografia ime në murin tënd më bën pis.
Mos e përdor për të larë përgjegjësitë e tua.
Mos e përdor për të fshehur dështimet e tua.
Mos e përdor për të ndërtuar historinë tënde si shpëtimtar.
Unë nuk jam ti.
Dhe nëse jam në shesh, nuk jam aty sepse më ka mashtruar dikush.
Jam aty sepse e di shumë mirë kush më ka sjellë deri këtu
