ELBASAN-Një incidet mes profesionistësh në sallën e gjyqit ka përfunduar me arrestimin e avokatit Ulian Barjami. Barjami u vendos në pranga pas kallëzimit të prokurorit Gjergji Ceka, i cili pretendon se Barjami e ka kërcënuar dhe akuzuar për falsifikim provash. Por cilat ishin provat që 'ndezën' seancën në Gjykatën e Elbasanit?
Në seancën e 17 tetorit, Ulian Barjami ishte avokati mbrojtës i Maksim Likës, i njohur edhe si mik i Emiljano Shullazit. Akuza ndaj Likës përfaqësohej nga prokurori Gjergji Ceka. Avokati pasi konstatoi provën me video të parashtruar në seancë, ku klienti i tij nuk shfaqej aspak duke kundërshtuar me dhunë punonjësit e policisë, ka deklaruar gjatë seancës se provat janë të falsifikuara dhe se do të depozitojë një kallëzim kundër prokurorit.
Nga ana tjetër prokurori Ceka, i cili sipas Dhomës së Avokatisë në procesverbalin e sjellë me shkrim në seancë përshkruante një situatë ku klienti i avokatit Barjami kishte ushtruar dhunë ndaj punonjësve të policisë, replikoi me avokatin Barjami duke e paraljamëruar se do të arrestohej.
Prokurori Ceka: Ti duhet të arrestohesh, do të arrestohesh!
Avokati Barjami: Do të bëj kallëzim, se ke shkelur ligjin.
Në këto kushte pas përfundimit të seancës, prokurori Ceka e ka kallëzuar avokatin për kanosje. Dhoma e Avokatisë njoftoi se avokati është arrestuar si i akuzuar për veprat penale "Kanosja për shkak të detyrës", "Kundërshtimi dhe goditja e gjyqtarit", dhe "Kanosja e gjyqtarit".
Sipas Dhomës së Avokatisë, ky akt është tërësisht arbitrar dhe synon të frikësojë dhe zmbrapsë avokatët në detyrën për mbrojtjen e klientëve të tyre. Për më tepër, Dhoma e Avokatisë pretendon se është manipuluar edhe procesverbali i arrestimit të avokatit. Ndër të tjera Avokatia i bën thirrje Inspektorit të Lartë të Drejtësisë, Këshillitt ë Lartë të Prokurorisë si dhe Prokurorisë së Përgjithshme të veprojnë urgjentisht
Qëndrimi i Dhomës së Avokatisë së Shqipërisë
Kemi të bëjmë me arrestimin e avokatit për shkak të deklarimeve të tij në kuadrin e mbrojtjes në sallën e gjyqit, duke u trajtuar deklarata e tij — se do të bëjë kallëzim për falsifikim provash kundër prokurorit — si kanosje dhe kundërshtim i prokurorit. Ngjarje kjo e paprecedentë, ku një avokati i hiqet liria për shkak të fjalës së lirë në sallën e gjykimit, ku ai shpreh mendimin për falsitetin e provës dhe përgjegjësinë që, sipas avokatit, duhet të mbajë autori i falsifikimit, që në këtë rast është prokurori. Dhoma e Avokatisë u bën thirrje Inspektorit të Lartë të Drejtësisë, Këshillitt ë Lartë të Prokurorisë si dhe Prokurorisë së Përgjithshme të veprojnë urgjentisht për këtë rast flagrant arbitrariteti dhe shkeljeje të hapur të ligjit. Kjo, pasi Dhoma, duke u bazuar në kuadrin ligjor dhe Kushtetutën e Shqipërisë, ende beson se jemi Republika e Shqipërisë – një shtet me drejtësi të bazuar në prova dhe fakte – dhe jo në një “Republikë të Prokurorëve”.
Ndërkohë Gjykata e Elbasanit caktoi masën “arrest në shtëpi”, për Maksim Likën, klientin e avokatit në pranga, si pjesë e grupit prej 14 personash të arrestuar që u gjendën në një lokal të këtij qyteti, të armatosur./ZËRI
