POGRADEC- Një automjet tip "Range Rover" është përfshirë nga flakët në orët e para të mëngjesit të sotëm në Pogradec. Ngjarja është regjistruar në lagjen nr. 1, në afërsi të Capri Center, ku mjeti i parkuar, është djegur pothuajse plotësisht.
Sipas burimeve, automjeti rezulton të jetë në pronësi të Erion Maxhari, emër i njohur për policinë e Pogradecit. Ky i fundit rezulton me precedentë të mëparshëm penalë për vepra të ndryshme. Burime bëjnë me dije se ditën e zgjedhjeve, ai ka qenë ndër personat e arrestuar pas një konflikti fizik me një komisioner.
Mësohet gjithashtu se Maxhari ka shërbyer më parë si efektiv policie në doganën e Qafë-Thanë. Në vitin 2018, Erion Maxhari u arrestua së bashku me tre efektivë të tjerë policie, pasi akuzoheshin si pjesë e një grupi të strukturuar që merrej me trafikimin e klandestinëve nga Shqipëria drejt Shteteve të Bashkuara të Amerikës, Kanadasë dhe Anglisë.
Sa i përket ngjarjes në Pogradec, dyshohet se zjarrvënia mund të ketë qenë e qëllimshme, megjithatë shkaku i zjarrit nuk është konfirmuar ende zyrtarisht. Grupi hetimor ndodhet në vendngjarje dhe po kryen këqyrjen e zonës, ndërsa janë sekuestruar kamerat e sigurisë përreth për të zbardhur rrethanat.
Pogradec/Informacion paraprak
Më datë 26.02.2026, rreth orës 03:50, në lagjen nr.1, Pogradec, ka rënë zjarr në automjetin e shtetasit E. M., i cili ka qenë i parkuar.
Grupi hetimor po punon për sqarimin e rrethanave të ngjarjes dhe përcaktimin e shkakut të rënies së zjarrit.
