TIRANË- 55 punonjës të Kadastrës së Vlorës, vijojnë të qëndrojnë brenda godinës së institucionit, pavarësisht urdhërit të dhënë për mbylljen e kësaj zyre, dhe transferimin e shërbimeve në Kadastrën e Tiranës.
Këtë të martë, një pjesë e punonjësve kanë pritur mes lotësh nëndrejtorin Sokol Shehaj, i cili u shkarkua një ditë më parë nga detyra, vetëm se doli në krahun e tyre. Vetë Shehaj, me banim në Tiranë, e kishte komod transferimin në kryeqytet, megjithatë ai iu ka dalë në mbrojtje 55 punonjësve, që janë përballur me faktin se nëse duan të mbajnë vendin e punës do të duhet të transferohen.
Punonjësit e Kadastrës së Vlorës kanë kërkuar mbështetje nga përfaqësuesit ligjorë, si deputete ashtu dhe drejtuesi politik.
Vendimi për transferimin e Kadastrës së Vlorës është firmosur më 23 janar nga drejtoresha e përgjithshme e Kadastrës, Lorena Goxhobelli, ndërsa procesi i transferimit duhet të përfundojë brenda fundit të këtij muaji.
Në Vlorë kishte mbetur vetëm një pjesë e strukturave, pasi transferimi ka nisur prej vitit të kaluar, përfshirë drejtorin dhe 25 punonjës të cilët prej muajsh po punojnë në drejtorinë e përgjithshme. Siç mësohet bëhet fjalë vetëm për 55 punonjës që janë në Vlorë dhe do të duhet të lëvizin në kryeqytet.
Vendimi për të larguar Kadastrën e Vlorës në Tiranë vjen vetëm një vit pasi institucioni ishte zhvendosur në një godinë të re në qytetin bregdetar, pranë ish-Shtëpisë së Oficerëve, ndërkohë që ky institucion është përballur me dorëheqje dhe largime të vazhdueshme të drejtuesve, pa mundur që të futet në një proces real reformimi. /ZËRI
