VLORË- Prej 4-5 ditësh qytetarësh e Vlorës po përballen me mungesën e ujit, si pasojë e një defekti në rrjetin kryesor të ujësjellësit, situatë e cila ka çuar në protesta nga ana e qytetarëve. Në disa zona të Vlorës, Bashkia është duke shpërndarë ujë përmes autoboteve, por iu bën thirrje qytetarëve që ai të përdoret vetëm për shërbime komunale dhe jo për konsum.
“Ujësjellës Kanalizimeve Rajoni Vlorë, njofton qytetarët se ujin të cilin po e marrin nga autobotet, duhet t'a përdorin për shërbime komunale dhe jo për konsum”, thuhet në njoftimin e Ujësjellësit të Vlorës.
Pas katër ditësh pa ujë, qytetarët e Vlorës po protestojnë këto dy ditë përpara Bashkisë dhe në rrugët e qytetit, ndërkohë që situata paraqitet emergjente. Pasi gjetën të mbyllur derën e Bashkisë, dhe u përballën me punonjësit e policisë, protestuesit kanë bllokuar kryqëzimin kryesor të qytetit, të njohur si “Kapelja”. Si pasojë, kryqëzimi është plotësisht i bllokuar, ndërsa radhë të gjata automjetesh janë krijuar në të gjitha akset kryesore të qytetit. Protesta po zhvillohet për shkak të mungesës së ujit të pijshëm prej katër ditësh, situatë që ka shkaktuar pakënaqësi të madhe te banorët, ndërsa autoritetet nuk kanë ende një afat se kur defekti në tubacionin kryesor të qytetit do të rregullohet./ZËRI
