VLORË-Vlora ka hyrë në ditën e katërt që nuk furnizohen me ujë të pijshëm. Banorët prej ditësh tashmë presin në radhë në burimet e qytetit me mjete provizore dhe primitive për të mbushur ujë. Mbrëmjen e djeshme (28 dhjetor) vlonjatët e revoltuar u ngritën në protestë duke prishur mbrëmjen gala të organizuar nga Bashkia në teatrin e qytetit, ku u konfliktuan me policinë deri në përplasje fizike. Vlonjatët kanë paralajmëruar se nuk do të heqin dorë dhe sot në orën 10:00 do të protestojnë para Bashkisë.
'Parashikimet' për rikthimin e furnizimit me ujë mbëmjen e sotme
Një defekt i linjës kryesore ka ndërprerë ujin për mijëra familje. Ujësjellësi i Vlorës vijon punën prej tre ditësh për riparimin e defektit, por presioni i lartë i linjës që furnizon qytetin shkakton sërish çarje të pjesëve të salduara. Edhe gjatë mbrëmjes së kaluar, tentativa e fundit dështoi, duke e bërë të pamundur rikthimin e furnizimit normal me ujë.
-
Deputeti i Vlorës Ardit Bido: Uji mund të kthehet nesër
28 Dhjetor, 22:29
Deputeti i PS, Ardit Bido u shpreh se uji mund të rikthehet sot. Bido njoftoi se ndërhyrjet janë në fazën përfundimtare dhe po punohet për rikthimin gradual të furnizimit, por punimet janë duke vijuar me problematika. Sipas vetë banorëve, zhvillimi i fundit ishte se gomina kryesore që duhej montuar në tub ishte çuar gabim dhe puna kishte rifilluar nga fillimi nga teknikët dhe inxhinierët per ta çmontuar dhe montuar përsëri lidhjen.
Edhe pas përditësimit të fundit nga situata me punimet, një lajm i mirë për vlonjatët pritet mbrëmjen e sotme./ZËRI
