TIRANË- 9 persona janë arrestuar, një është ndaluar, 1 është shpallur në kërkim dhe 3 të tjerë janë vënë nën hetim pas publikimit të një materiali televiziv, ku dëshmohej qartë se si në qendrat e masazhit ushtrohej prostitucion.
Bëhej fjalë për 3 qendra masazhesh në Tiranë, të cilat menaxhoheshin nga një çift bashkëshortësh, ku vajza të reja ushtronin prostitucion, në pagesa që varionin deri në 10 mijë lekë të rinj. Në videon e transmetuar në emisionin Fiks Fare, ato i tregonin të infiltruarës së emisionit se si funksiononte e gjithë skema, nga gjetja e klientëve, te ndarja e fitimeve me menaxherët e qendrës.
Një tjetër detaj interesant i dëshmuar nga vajzat, ishte se ato kishin mbrojtje nga kontrollet policore, dhe e zhvillonin aktivitetin lirisht edhe pas ankesave të ndryshme të bëra nga ana e banorëve të pallatit.
Njoftimi i policisë:
Në lidhje me rastin e transmetuar mbrëmjen e djeshme, në emisionin "Fiks Fare”, për disa qendra masazhesh, në Tiranë, ju bëjmë me dije se:
Specialistët e Seksionit për Hetimin e Trafiqeve të DVP Tiranë, në vijim të procedimit penal të regjistruar në muajin shkurt të këtij viti, si dhe pas publikimit të pamjeve filmike, bënë ndalimin e shtetases E. O., 30 vjeçe (administratore e një qendre masazhesh), si dhe shpallën në kërkim shtetasin O. Rr., 36 vjeç, banues në Tiranë (pronari i qendrës së masazheve).
Në lidhje me rastet e tjera të transmetuara, janë kryer veprimet procedurale për subjektet e përmendura në video, konkretisht:
Më datë 10.01.2023, janë arrestuar 2 punonjëse të një qendre masazhesh në rrugën "Teodor Keko";
Më datë 27.03.2023, janë arrestuar 6 shtetas (administratori, 1 klient dhe 4 punonjëse), në një qendër masazhesh në rrugën "Teodor Keko";
Më datë 19.07.2023, është arrestuar 1 punonjëse e qendrës së masazheve dhe ka nisur procedimi në gjendje të lirë për 3 shtetase të tjera. (Në vijim të veprimeve procedurale për këtë qendër masazhesh, u bë ndalimi i shtetases E. O. dhe shpallja në kërkim e shtetasit O. Rr.).
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
