SHKODËR- Një sasi e madhe prej më shumë se 24 mijë bimësh kanabis është asgjesuar nga policia në një zonë pyjore në Velipojë. Si pronarë të parcelave me kanabis policia ka identifikuar 3 vëllezër, të cilët janë shpallur në kërkim. Marjan Ndrejaj, Pierin Ndrejaj dhe Luviq Ndrejaj, nuk janë gjetur pranë parcelave në momentin e operacionit, ndërsa janë proceduar në gjendje të lirë dy punonjës të OSHEE-së.
NJOFTIMI I POLICISË:
Shërbimet e Stacionit të Policisë Velipojë, në bashkëpunim me Drejtorinë Vendore të Policisë Shkodër dhe me Komisariatin e Shkodrës, në fshatin Rrjoll, në vendin e quajtur “Maja e Zezë”, gjetën dhe asgjësuan 24 759 bimë cannabisi.
Autorët e dyshuar, tre vëllezërit shtetasit M. N., 30 vjeç, P. N., 36 vjeç, dhe L. N., 32 vjeç, të tre banues në fshatin Rrjoll u identifikuan dhe u shpallën në kërkim.
Gjithashtu nisën hetimet për T. Sh., 61 vjeç, dhe P. M., 61 vjeç, të dy banues në Velipojë, punonjës të OSHEE-së, ndërsa mbi ta rëndojnë veprat penale “Shpërdorimi i detyrës”, pasi dyshohet se nuk kanë konstatuar lidhjen e paligjshme të energjisë elektrike që ishte krijuar për këtë veprimtari kriminale.
