SELANIK - Thrileri i zhdukjes së 41-vjeçares shtatzënë, Gjeorgjia Murati në Selanik përfundoi në mënyrën më të keqe të mundshme, pasi sot trupi i saj u gjet në një bagazh në një zonë pyjore të Halkidikit, midis Triglias dhe Galatistas. Sipas informacioneve nga burime policore, për vrasjen e saj është arrestuar partneri i saj dhe një nga miqtë e tij.
Siç sqaruan të njëjtat burime, historia u zbulua nga miku i partnerit të 41-vjeçares, i cili i pyetur në polici ka rrëfyer se 41-vjeçarja është vrarë nga partneri i saj dhe se ka ndihmuar në transportimin e saj për në zonën ku ajo u gjet. Shoku i partnerit të 41-vjeçares ishte sjellë në komisariat që në mëngjes, pasi në shtëpi i ishin gjetur gjurmë. Ai ishte një person, që ka pasur precedent kriminalë dhe në të kaluarën. Ditët e mëparshme partneri i 41-vjeçares ka tentuar të devijojë hetimet e autoriteteve, duke thënë se gruaja është zhdukur, duke marrë me vete një shumë të madhe parash.
Si gjurmoi rastin policia?
Menjëherë pas zhdukjes së gruas fatkeqe, policia ka nisur hetimet. Në kuadër të analizës së pamjeve nga kamerat e zonës, burri i saj dhe shoku i tij janë parë duke dalë nga shtëpia, me një makinë dhe kanë hapur bagazhin. Policia më pas kontrolloi shtëpinë ku gjeti gjurmë gjaku, flokët dhe ADN-në e gruas.
Më pas u mor në pyetje shoku i autorit, i cili ka rrëfyer se ka ndihmuar partnerin e 41-vjeçares për të transportuar trupin e pajetë në vendin ku u gjet në Halkidiki. Madje, ai ka thënë se nuk është përfshirë në vrasjen e saj dhe e vetmja përfshirje e tij ka qenë transportimi i trupit.
Së fundi, ai tha se çifti kishte probleme financiare, ndërsa pohoi se ka pasur edhe dhunë në familje. Partneri i 41-vjeçares është denoncuar nga motra e tij se e ka rrahur. Në të njëjtën kohë, sipas Alpha-s, partneri i 41-vjeçares është dënuar për rrahjen e motrës së tij. Konkretisht, 2-3 vite më parë ai ka rrahur vazhdimisht motrën e tij dhe gruaja është shtruar në spital me lëndime në kokë dhe në trup. Siç deklaroi ajo, ajo ka ende boshllëqe në kujtesë dhe stres post-traumatik. Sipas denoncimit të gruas, gjithçka ka ndodhur pasi ajo nuk i jepte para./ZËRI/
