SHBA - Një gjykatë federale e Apelit të martën la në fuqi një ndalim të përjetshëm për Martin Shkrelin për të punuar në industrinë farmaceutike, si dhe një urdhër për të paguar deri në 64.6 milionë dollarë.
Vendimi unanim nga një panel prej tre gjyqtarësh në Gjykatën e 2-të të Apelit të Rrethit të SHBA-së erdhi gati dy vjet pasi një gjykatës federal i Nju Jorkut, vendosi ndalimin e Shkrelit për sjelljen monopoliste të kompanisë së tij të atëhershme të ilaçeve në shpërndarjen e Daraprim. Ndalimi ishte në përgjigje të një padie civile të ngritur nga Komisioni Federal i Tregtisë dhe shtatë shtete, mes tyre Nju Jorku dhe Kalifornia.
Shkreli fitoi famë të gjerë në vitin 2015, kur kompania e tij rriti çmimin e ilaçit që shpëton jetë me më shumë se 4,000% brenda natës. Më vonë ai kreu një dënim me burg për mashtrim të letrave me vlerë federale dhe krime të tjera financiare që nuk lidhen me rritjen e diskutueshme të çmimit të Daraprim, e cila përdoret për të trajtuar toksoplazmozën, një gjendje parazitare.
Avokati i tij, Benjamin Brafman, në një deklaratë për CNBC duke komentuar vendimin e Gjykatës së Apelit, tha: "Ndalimi i përjetshëm është shumë i rëndë". Trupi gjykues tha se do ta merrte këtë vendim, sido që të ishte mbrojtja e Shkrelit./ZËRI/
