TIRANË- Rikthehet moti i keq në vend. Këtë të martë Korça dhe Shkodra u zbardhën nga dëbora, ndërsa Tirana u zgjua nën reshjet e shiut, të cilat u ndërprenë në mesditë. Fshatrat turistikë të Shkodrës, Boga, Thethi, Tamara dhe Vërmoshi u zgjuan të mbuluara nga dëbora, ndërsa u hasën dhe vështirësi në qarkullimin e mjeteve.
Autoriteti Rrugor Shqiptar bën me dije se akset rrugore Hani i Hotit - Tamarë, Bogë - Theth, Ura e Zapodit - Shishtavec, Bulqizë - Peshkopi dhe Boboshticë - Dardhë, gjatë natës dhe në orët e para të mëngjesit, janë rikthyer reshjet e dëborës me intensitet mesatar.
Probleme ka pasur në Bulqizë e Dibër. Borëpastrueset janë në terren për hapjen dhe kriposjen e rrugëve. Dhe në Korçë ka pasur probleme gjatë orëve të para të mëngjesit. Kryesisht në Maliq dhe zonat malore të Pogradecit./ZËRI
