BELGJIKË- Një rrjet trafiku droge që transportonte mallrat përmes portit të "Le Havre" është goditur nga Policia belge. Sipas mediave të huaja, nga goditja e grupit, Policia belge ka gjetur dhe sekuestruar 667 kg kokainë, e cila ishte loguar me gërmat "KG". Hetimi për grupin italo-shqiptar filloi në vitin 2022, duke u bazuar në përgjimet e çkoduara të aplikacionit "Sky ECC".
"Banda drejtohej nga një familje italiane me kontakte me furnizues në Kolumbi dhe kimistë në Belgjikë,"- thuhet në raportin e zyrës së policisë evropiane të Europol.
Mesazhet zbuluan se grupi dërgonte drogë në të paktën gjashtë vende evropiane, përfshirë Gjermaninë, Francën dhe Italinë. Përpara se të shpërndahej në këto vende, lënda narkotike në formë paste transportohej ilegalisht në Europë, dhe përpunohej në një laborator në Belgjikë. Në depon ku përpunohej droga, u sekuestruan pajisje, një peshore për kokainë dhe automjete që përmbanin vende të fshehta për transportimin e drogës.
Europol zbuloi se 14 persona u arrestuan nga të cilët: 11 u kapën në Belgjikë, 2 në Gjermani dhe 1 në Itali. Por identiteti i asnjërit prej tyre nuk është bërë me dije nga mediat e huaja. Përveç kokainës, Europol tha se organizata kriminale ishte gjithashtu e përfshirë në trafikimin e heroinës dhe pastrimin e parave./ZËRI
