Eurodeputetët grekë “kryqëzojnë” Belerin, si e favorizoi të “përzgjedhurin” e Elon Musk

Fredi Beleri dhe Fidias Panayiotou

ATHINË- Fredi Beleri, i cili është përzgjedhur si eurodeputet nga Greqia, po përballet me kritika të shumta, pasi votoi për “të preferuarin” e Elon Musk dhe të djathtës ekstreme, Fidias Panayiotou. E gjitha nisi kur eurodeputeti i partisë së kryeministrit grek Kyriakos Mitsotakis, “Demokracia e Re”, propozoi youtuberin qipriot për postin e nënkryetarit të Komitetit Special "Mburoja për Demokracinë Evropiane" në Parlamentin Evropian. Fidias Panayiotou përfundimisht nuk u zgjodh pasi humbi me rezultatin "33-21" nga një kandidat socialist. Megjithatë, kjo lëvizje e Belerit nxiti reagimin e eurodeputetit të SYRIZA-s, Kostas Arvanitis, i cili foli për aleancë mes ND-së me të djathtën ekstreme dhe Elon Musk.

Kujtohet se për këtë pozicion specifik, ndërhyri edhe pronari miliarder i X-it, Elon Musk duke kërkuar që të votohet Phidias pasi sipas tij ishte: I zgjuar, i palëkundur dhe kujdeset sinqerisht për njerëzit!

Në fakt, sipas informacioneve, Beleri nuk e kishte njoftuar kryetaren e eurodeputetëve të ND-së, Eliza Vozeberg për propozimin e tij; nga ana tjetër Beleri e justifikoi veprimin e tij duke thënë se ishte "zgjedhje personale" që bazohej vetëm në "origjinën greke" të Phidias Panayiotou.

“Në mbledhjen e sotme të Komitetit Special të sapoformuar të Parlamentit Evropian “Mburoja për Demokracinë Evropiane”, u ngrit çështja e plotësimit të postit të zëvendëspresidentit. Nuk kishte asnjë kandidat nga Partia Popullore Evropiane. Zgjodha të mbështes deputetin e pavarur qipriot, Phidias Panayiotou, bazuar vetëm në origjinën e tij greke dhe asgjë më shumë. Komplekset e z. Arvaniti as më prekin dhe as më shqetësojnë,”-sqaroi Beleri në rrjetet e tij sociale. 

Si kundërpërgjigje, eurodeputeti i SYRIZA, Kostas Arvanitis akuzoi Demokracinë e Re për partneritet me të djathtën ekstreme në favor të Elon Musk në Parlamentin Evropian.

Lidhur me diskutimet ndërhyri edhe eurodeputetja dhe njëherazi kryetarja e Komitetit të Transportit dhe Turizmit, Eliza Vozeberg, e cila u shpreh se emri i Panayiotou ishte zgjedhje personale e Belerit dhe nuk kishte lidhje me linjën politike të partisë "Neodemokracia". Në shenjë "pendese", Beleri shpërndau deklaratën e Vosberg dhe shkroi: Dua të konfirmoj atë që thotë kryetarja e grupit tonë. Ishte zgjedhje personale.

Vetë Fidias Panayiotou tha se kishte garuar për ta bërë edhe Europën e Madhërishme. E gjitha erdhi pasi vetë Musk u bëri thirrje evropianëve që t'i bashkohen lëvizjes "Make Europe Great Again" - MEGA, duke parafrazuar sloganin e Donald Trump./ZËRI

Në përputhje me standarded JTI