TURQI-Një gjykatë turke urdhëroi sot mbajtjen në paraburgimin të kryetarit të Stambollit Ekrem Imamoglu, i njohur edhe si rivali i Rexhep Tajip Erdogan. Kryebashkiaku i Ankarasë, i cili gjithashtu i përket Partisë Popullore Republikane (CHP) si Imamoglu, e quajti vendimin një “turp” për sistemin gjyqësor të vendit.
Gjykata turke tha se Imamoglu dhe të paktën 20 persona të tjerë janë burgosur si pjesë e një hetimi korrupsioni. Nuk ka ende një raport të veçantë për hetimin ndaj kryebashkiakut të Stambollit për “terrorizëm”. Prokurorët turq i kanë kërkuar gjykatës që të mbajë Imamoglun dhe katër bashkëpunëtorët e tij në pritje të gjyqit, siç njoftoi më herët zyra e kryebashkiakut të Stambollit, me atë që mohoi kategorikisht akuzat për korrupsion dhe lidhje me PKK (Partia e Punëtorëve të Kurdistanit), duke i përshkruar ato si “të pamendueshme”, “të pabazuara” dhe “të pamoralshme”.
Miratimi i propozimit të prokurorit do të thotë që Imamoglu do të shkarkohet nga detyra, pasi legjislacioni në Turqi i lejon qeverisë të emërojë dikë tjetër në vend të tij. Ky vendim pritet të shkaktojë protesta edhe më të mëdha se ato që janë zhvilluar në shumë qytete të mëdha të Turqisë për katër ditët e fundit.
Çfarë ndodhi në ditën e katërt të paraburgimit?
Teksa kryebashkiaku i Stambollit ishte në Gjykatë, të gjitha rrugët u mbyllën dhe mijëra njerëz protestuan para Gjykatës. Autoritetet turke kanë arrestuar 343 persona në protestat që u zhvilluan gjatë natës në qytete të ndryshme të vendit kundër arrestimit të Imamoglu. Ministria tha se arrestimet u bënë për të parandaluar "çrregullimin e rendit publik" dhe paralajmëroi se autoritetet nuk do të toleronin "kaosin dhe provokimet".
Arrestimi i tij këtë javë ka rritur tensionin politik dhe ka shkaktuar protesta të gjera në të gjithë Turqinë. Demonstratat janë paralajmëruar se do të zhvillohen në shumë qytete të tjera të vendit, si dhe në Izmir (perëndim) dhe kryeqytetin Ankara. Në total, tubime janë zhvilluar në të paktën 55 nga 81 provincat e Turqisë që nga e mërkura, më shumë se dy të tretat e vendit. Ndërkohë aktualisht, kryebashkiaku i Stambollit po merret në pyetje për herë të dytë nën akuzat për korrupsion dhe mbështetje për terrorizëm. Bashkë me të, 90 persona të tjerë janë arrestuar.
Imamoglu akuzohet se është lideri i një organizate kriminale; akuzohet për manipulim tenderash dhe ndihmë për organizatë terroriste. Imamoglu, 54 vjeç, u arrestua derisa CHP-ja po përgatitej për ta shpallur atë kandidat presidencial. Partia u ka kërkuar njerëzve të votojnë për të në kutitë e votimit të vendosura në të gjithë vendin, si shenjë e rezistencës publike. Zgjedhjet e ardhshme presidenciale në Turqi duhet të mbahen më 2028, por Erdogan, 71 vjeç, mund të shpallë zgjedhje të parakohshme për ta shmangur kufizimin prej dy mandatesh, nëse vendos të garojë përsëri./ZËRI
