GREQI- Greqia do të ndalojë përdorimin e rrjeteve sociale nga fëmijët nën 15 vjeç, duke nisur nga 1 janari 2027. Vendi ka përcaktuar tashmë mënyrën se si do të funksionojë masa, ndërsa përgjegjësia kryesore për të kontrolluar moshën e përdoruesve dhe për të bllokuar ata që nuk plotësojnë kufirin do t'u takojë vetë platformave.
Mediat greke raportojnë se një fëmijë nën 15 vjeç në Greqi nuk do të mund të hapë apo të përdorë lirisht një llogari në rrjetet sociale vetëm duke vendosur një datëlindje të rreme. Platformat do të kenë përgjegjësinë të përdorin sisteme të besueshme për verifikimin ose vlerësimin e moshës. Kur ka paqartësi, mund të përdoret aplikacioni Kids Wallet.
Ministri i Qeverisjes Digjitale, Dimitris Papastergiu tha gjithashtu se propozimi europian Akti BE KIDS parashikon shërbime të kufizuara për moshat 13 deri në 15 vjeç: pa llogari personale, me bllokim gjatë natës, deri në një orë përdorim në ditë dhe pa rrjedhën e pafundme të përmbajtjeve. Ministri theksoi se ligji nuk mjafton, nëse familjet nuk ndryshojnë edhe mënyrën e përdorimit të telefonit.
Kompanitë teknologjike kanë kohë deri në fund të këtij viti për t'i përshtatur sistemet e tyre. Nga 1 janari 2027, deklarimi i një moshe të rreme nuk duhet të mjaftojë më për t'i hapur një fëmije nën 15 vjeç dyert e rrjeteve sociale.
