GRAZ- Një rast që ka tronditur Austrinë dhe Slloveninë është në qendër të hetimeve pasi trupi i influencueses 31-vjeçare Stefanie Pieper u gjet brenda një valixhe në një zonë pyjore në Slloveni. E reja u zhduk më 23 nëntor, disa orë pasi u kthye në shtëpi nga një festë Krishtlindjesh në Graz të Austrisë. Ish-partneri i saj Patrick M. ka rrëfyer se e ka vrarë atë pas një konflikti dhe policia tani po heton nëse e ka varrosur të gjallë, sipas Daily Mail.
Sipas policisë së Styrian, influencuesja - e njohur për përmbajtjen e saj të grimit, modës dhe muzikës në platformat e mediave sociale - fillimisht i kishte dërguar një mesazh një shoqeje se ishte kthyer shëndoshë e mirë.
Megjithatë, pak më vonë, pasoi një mesazh i dytë shqetësues, në të cilin ajo tha se besonte se "dikush ndodhej te shkallët" e ndërtesës së saj të apartamentit. Ish-partneri i saj 31-vjeçar rrëfeu se e kishte mbytur dhe më pas e kishte futur në një valixhe dhe e kishte varrosur në Slloveni.
Megjithatë, ndërsa fillimisht u besua se influencuesja kishte vdekur përpara se 31-vjeçari të varroste valixhen, detaje të reja sugjerojnë se ajo mund të ishte ende gjalle, kur ai e ka varrosur. Mjekësia mjeko-ligjore përcaktoi se ajo kishte pësuar një dëmtim serioz në qafe dhe ishte mbytur, ndërsa u gjetën edhe lëndime në fytyrë.
Kur të afërmit dhe kolegët e saj nuk mundën ta kontaktonin dhe ajo nuk u paraqit në punë, e shpallën të zhdukur. Hetimi i autoriteteve përfundimisht çoi në arrestimin e ish-partnerit të saj 31-vjeçar në Slloveni, pranë një makine të djegur që i përkiste atij.
Në një deklaratë, policia e Styrian tha se mbrëmjen e 24 nëntorit, policia sllovene raportoi se një makinë kishte shpërthyer në flakë në parkingun e një kazinoje pranë kufirit. Mjeti i përkiste 31-vjeçarit.
Pas arrestimit të tij, burri u ekstradua në Austri dhe thuhet se ka bashkëpunuar me autoritetet gjatë marrjes në pyetje.
Autoritetet konfirmuan gjithashtu se dy të afërm të të dyshuarit janë arrestuar për të njëjtin rast. Hetimet po vazhdojnë si në Austri ashtu edhe në Slloveni, me të dy agjencitë që punojnë ngushtë për të zbardhur rastin./ZËRI
