SHBA- Aktori amerikan, dy herë fitues i çmimit Oscar, Gene Hackman, 95 vjeç, dhe gruaja e tij 63-vjeçare, Betsy Arakawa, u gjetën të vdekur në shtëpinë e tyre në Santa Fe, New Mexico. Faqja e internetit citon Sherifin e Qarkut Santa Fe, Adam Mendoza, i cili thotë se çifti u gjet pa jetë së bashku me qenin e tyre. Por po ashtu shton se nuk ka asnjë shenjë se çifti mund të jenë vrarë.
Edhe pse autoritetet deklaruan se nuk ka dyshime për vrasje, shkaku i vdekjes së tyre mbetet i paqartë, duke lënë shumë pyetje pa përgjigje: Si u ndanë nga jeta në të njëjtën kohë? Çfarë ndodhi në shtëpinë e Hackman të mërkurën pasdite?
"Kjo çështje po hetohet ende. Megjithatë, në këtë moment ne nuk besojmë se ka ndonjë indikacion për aktivitet kriminal,”-tha sherifi i zonës.
Kush ishte Gene Hackman?
Një ish-marinist, Hackman u shfaq në më shumë se 80 filma, si dhe në seri televizive dhe shfaqje skenike gjatë karrierës së tij që filloi në vitet 1960. Ai ishte martuar dy herë dhe kishte tre fëmijë. Ai dhe gruaja e tij e dytë, pianistja Betsy Arakawa, u martuan në vitin 1991.
Gene Hackman lindi në San Bernardino, Kaliforni në vitin 1930. Prindërit e tij ishin Eugene Ezra Hackman dhe Laida Grey. Familja e tij u zhvendos vazhdimisht nga një vend në tjetrin, derisa ai u vendos në Danville, Illinois, në shtëpinë e gjyshes së tij. Babai i tij punonte si printer për gazetën lokale, Commercial-News. Prindërit e tij u divorcuan në vitin 1943 dhe babai i tij braktisi familjen.
Hackman i kaloi vitet e adoleshencës në Storm Lake, Iowa, dhe në moshën 16-vjeçare u largua nga shtëpia për t'u regjistruar në Trupat e Marinës së Shteteve të Bashkuara, ku shërbeu për 4 vjet. Pas shkarkimit të tij, ai u transferua në Nju Jork, ku punoi në punë të çuditshme për të përballuar jetesën. Nëna e tij, e cila vdiq në vitin 1962, ishte viktimë e një zjarri që shkaktoi aksidentalisht me një bisht cigareje.
Momentet e mëdha kinematografike dhe dy Oscar's
Në vitin 1971, ai fitoi një Oscar për aktorin më të mirë për filmin "Njeriu nga Franca". Në vitin 1992, ai luajti rolin e sherifit sadist Little Bill Daggett në filmin e Clint Eastwood Unforgiven, i cili i dha atij çmimin Oscar për aktorin më të mirë dytësor. Megjithatë ai ka luajtur edhe qindra role të tjera duke shënuar me gërma të arta emrin e tij në kinema.
Vitin e kaluar, Hackman dhe gruaja e tij 63-vjeçare u panë në publik për herë të parë në dy dekada. Hackman u fotografua duke mbajtur dorën e gruas së tij teksa shijonin vaktin e tyre në Pappadeaux's Seafood Kitchen në Santa Fe./ZËRI
